बिरामीको मृत्युपछि मणिपाल शिक्षण अस्पताल तनावग्रस्त, चिकित्सकमाथि हातपात

पोखरा-बिरामीको मृत्युपछि पोखराको मणिपाल शिक्षण अस्पताल तनावग्रस्त बनेको छ । लमजुङकी ५७ वर्षीया सुकमाया दुराको अस्पतालको आईसीयुमा उपचारका क्रममा मृत्यु भएपछि डाक्टरमाथि हातपात भएको थियो ।

अस्पतालमा तनाव भएपछि उल्लेख रुपमा प्रहरी परिचालन गरिएको छ । डाक्टरमाथि भएको हातपातको विरोधमा तथा अरु डाक्टरमाथि पनि हातपात हुनसक्ने डरले डाक्टर, नर्सलगायतका स्वास्थ्यकर्मीहरुले स्वास्थ्य सेवा ठप्प पारी प्रहरी घेरामा बसेका छन् ।

दिउँसोबाट विवाद चर्चिएपछि अस्पतालको सेवा ठप्प पारिएको मणिपाल शिक्षण अस्पतालका मेडिकल विद्यार्थीले बताए । डाक्टरले सेवा ठप्प पारेपछि अस्पतालमा बिरामीका आफन्तहरु अस्पतालकै खाली ठाउँमा अन्योलपूर्ण अवस्थामा रहेका छन् । बिरामीका आफन्तहरु डाक्टरले अरु बिरामीलाई वेवास्ता गर्न नहुने तर्क गर्छन् ।

अस्पताल र मृतकका आफन्तहरुबीच वार्ताको पहल भइरहेको कास्की प्रहरी प्रवक्ता श्रवणकुमार विकले जानकारी दिए ।