पोखरा—गण्डकी प्रदेश प्रमुख डिल्लीराज भट्टले जैविक विविधताका कारण नेपाल आयुर्वेदिक औषधिको विकासका लागि निकै उपयोगी क्षेत्र भएको बताएका छन् । आयुर्वेदिक औषधिले अन्य रोग ननिम्तने भएकाले मानव स्वास्थ्य राम्रो बनाउन आयुर्वेदिक उपचार पद्धतिलाई प्रवर्द्धन गरिनुपर्ने उनको भनाइ थियो ।
भट्टले स्वस्थ नागरिक समृद्ध मुलुकको आधार रहेको बताए । शुक्रबार पोखरामा आयोजित आरोग्य अभियान, आयुर्वेद सेवासम्बन्धी अन्तक्रिया कार्यक्रममा उनले सो कुरा बताएका हुन् ।
गण्डकी आयुर्वेद औषधालय, कास्की र जिल्ला नागरिक आरोग्य समिति, कास्कीको संयुक्त आयोजना तथा जिल्ला समन्वय समितिको समन्वयमा उक्त कार्यक्रम भएको थियो ।
स्वस्थ खानपान र जीवनशैलीले रोग लाग्न नदिने र रोग लागेमा आयुर्वेदिक औषधोपचारमा जोड दिन पनि उनले आग्रह गरे । योग, ध्यान, सिद्धि, उचित खानपान एवं आयुर्वेद औषधोपचार गर्ने व्यक्ति दीर्घजीवी हुने गरेको भन्दै प्रदेश प्रमुख भट्टले आफू पनि ७७ वर्षको उमेरमा स्वस्थ, तन्दुरुस्त भएको तर्क गरे ।
‘स्वस्थ जीवन भएमा मात्र मुलुकको आर्थिक समृद्धि कायम हुनेछ । योग, ध्यान, साधना र व्यायामले व्यक्तिमा सकारात्मक सोचको विकासमा प्रेरणा मिल्छ,’ उनले भने, ‘मानव जीवनको सबैभन्दा महत्वपूर्ण र संवेदनशील पाटो नै स्वास्थ्य हो । त्यसैले स्वास्थ्य क्षेत्रको विकासलाई समग्र देशकै विकास र समृद्धिसँग जोड्नुपर्छ । नागरिक स्वस्थ भए मात्रै मुलुक स्वस्थ बन्न सक्छ ।’
नेपालमा आयुर्वेदिक औषधोपचारलाई प्रवर्द्धन गर्नका लागि यस्ता आयुर्वेद सेवासम्बन्धी अन्तक्रिया एवं छलफलले योजना तयार गर्न टेवा पुग्ने विश्वास व्यक्त गरे ।
