रुपन्देही—लामो समयदेखि सञ्चालनमा रहेको सिद्धार्थनगर सिटी हस्पिटलले लुम्बिनी रोडमा आफ्नै जग्गामा ५५ हजार वर्ग फिट बनेको ६ फ्लोरको भवनमा अस्पताल सञ्चालनमा ल्याउने भएको छ । रुपन्देहीमा ठूलो लगानीमा बनेको १०० शैय्याको उक्त हस्पिटल पुसदेखि नयाँ भवनबाट सञ्चालनमा ल्याउने तयारी छ ।
नेपाल सरकारको मापदण्डअनुरुप सञ्चालनमा आउन लागेको हस्पिटलको प्रोजेक्टलागत झण्डै ७० करोड रहेको अस्पतालका प्रबन्ध निर्देशक अर्जुन पौडेल जानकारी दिए । ‘भूकम्पमा पनि क्षति नपुग्ने गरी भवन अन्तर्राष्ट्रिय मापदण्डअनुसार बनाइएको छ,’ उनले भने, ‘अस्पतालमा बिरामीहरुलाई स्टेचरमा गुडाएर लाने ¥याम्प र एकै पटकमा २ वटा स्टेचरको बिरामी लैजाने सक्ने ठूलो विद्युतीय लिफ्ट छ ।’
अस्पतालमा लाइट र भेन्टिलेसनसहितका वार्डहरु रहनेछन् । सेवा लिन आउने बिरामीहरुलाई छिटो, छरिताे सेवा दिनका लागि प्रत्येक विभागलाई डिजिटलाइज्ड गरिनेछ । पेपर वर्क र कागजी प्रक्रिया कम गरिने अस्पतालमा प्रबन्ध निर्देशक पौडेलले बताए ।
अस्पतालका अध्यक्ष तथा मिर्गौला रोग विशेषज्ञ डा. सुबोधकुमार पाण्डेले यो क्षेत्रमा धेरै आकस्मिक बिरामीहरु आउने हुँदा १५ शैय्याको आकस्मिक कक्षमा अति सिकिस्त, सिकिस्त र सामान्य गरी ३ किसिमको वर्गीकरण गरेर सेवा दिने तयारी रहेको जानकारी दिए । उनकाअनुसार अस्पतालमा ३ वटा मोडुलर अत्याधुनिक अपरेशन थिएटर सञ्चालन हुनेछन् ।
अस्पतालका मेडिकल डाइरेक्टर डा. अमित चतुर्वेदीकाअनुसार ५ करोड बराबरको लागतमा अत्यन्त एडभान्स ६४ स्लाइस सिटी स्क्यान रहने उनले बताए । मुटुका बिरामीहरुलाई सेवा दिनका लागि जर्मनमा निर्मित मेसिनद्वारा इको, टीएमटी, हल्टर मोडुलर सीसीयु सञ्चालन हुनेछ ।
मोडुलर ओ.टी मा न्युरो, हाड जोर्नी, सामान्य सर्जरी, महिला सम्बन्धी सम्पूर्ण अपरेशन हुनेछन् । मोडुलर आई.सी.यु जर्मनमा निर्मित स्तरीय भेन्टिलेटर तथा मोनिटर रहने छ । बिरामीको सहजताका लागि घरायसी वातावरण भएको वातानुकुलीत सुविधा सम्पन्न क्याविनहरु उनले बताए ।
हस्पिटल नजिकै अन्तर्राष्ट्रिय एयरपोर्ट र पर्यटकीय गन्तव्य लुम्बिनी भएको हुँदा विदेशी पाहुनाहरुको सहजताको लागि १८०० स्क्वायर फिटको अन्तर्राष्ट्रिय कम्प्लेक्स रहेको छ । जसमा ओ.पि.डी., अब्जरबेसन वेड र २ वटा होटल जस्तै स्वीट रुम क्याबिन रहेको छ । यस अस्पताल स्थानीयस्तरका ख्यातिप्राप्त केही डाक्टरहरु र अनुभव भएको काठमाडौंका ख्याती प्राप्त अस्पतालका डाक्टरहरुबाट विशेष किसिमको सेवा सञ्चालन गरिनेछ ।
अस्पतालबाट प्युठान, अर्घाखाँची, गुल्मी, पाल्पा पहाडी क्षेत्र, कपिलवस्तु, नवलपरासी, रुपन्देही र भारतीय सीमा क्षेत्रका बिरामीहरु लाभान्वित हुनेछन् ।
