काठमाडौं—कोरोना भाइरस कोभिड—१९ विरुद्धको खोप खरिद गर्नका लागि स्थापना गरिएको कोरोना कोषमा २० करोड रुपैयाँ रकम जम्मा भएको छ । नेपालमा खोपका लागि ४८ अर्ब लाग्ने अनुमान गरिएको छ । तर, २० करोड मात्रै जम्मा भएको जनाएको छ ।
सरकारले ७२ प्रतिशत जनतालाई कोरोना विरुद्धको खोप दिने बताएको छ । पहिलो चरणमा २० प्रतिशत अर्थात साढे ९ लाखलाई खोप दिइनेछ । पहिलो चरणमा खोप लगाउनेहरु स्वास्थ्यकर्मी, वृद्धवृद्धा र प्रन्टलाइन कर्मचारी पर्ने छन् । उक्त खोप सहुलियल दरमा कोभ्याक्स सुविधाले उपलब्ध गराउने छ ।
स्वास्थ्य तथा जनसंख्या मन्त्रालयकाअनुसार खोप खरिदका लागि रकम अभाव भएको छ । एक अधिकारीले भने, ‘४८ अर्ब लाग्नेमा २० करोड मात्रै जम्मा भएको छ । फेरि सरकारले चुनाव घोषणा गरेकाले रकम जम्मा हुने अवस्था देखिएको छैन ।’ सरकारलाई चुनावका लागि ठूलो रकम आवश्यक पर्ने भएकाले खोप खरिदमा पुनः रकम अभाव हुने देखिएको अधिकारीहरु बताउँछन् ।
स्वास्थ्य मन्त्रालयले हालै अर्थ मन्त्रालय समक्ष रकम माग गरेको छ । तत्काल १ देखि ५ अर्बसम्म कोषमा जम्मा गर्न प्रस्ताव पठाएको छ । तर, स्वीकृत हुने सम्भावना ज्यादै न्यून भएको अधिकारीहरु बताउँछन् ।
