काठमाडौं– स्वास्थ्य तथा जनसंख्या मन्त्री हृदयेश त्रिपाठीले आफू मन्त्री भएको ६२ औं दिनसम्म आइपुग्दा तीन वटा विषयलाई प्राथमिकतामा राखेर काम गरिरहेको बताएका छन् । शुक्रबार सानेपास्थित स्टार अस्पतालको शिशु सघन स्याहार तथा उपचार कक्ष (एनआईसीयु)को उद्घाटन समारोहमा बोल्दै मन्त्री त्रिपाठीले आफू तीन प्राथमिकतामा केन्द्रित भएर काम गरिरहेको बताएका हुन् ।
उनले पहिलो प्राथमिकतामा कोभिड–१९ विरुद्धको खोप ल्याउने र त्यसलाई भण्डारण गर्ने व्यवस्था मिलाउने, दोस्रोमा प्रत्येक पालिकामा ५, १० र १५ बेड अस्पताल बनाउने महत्वाकांक्षी योजनालाई अघि बढाउने र तेस्रोमा स्वास्थ्यका कर्मचारीको समायोजन गर्ने काम अघि बढिरहेको बताए ।
मन्त्री त्रिपाठीले यतिबेला नेपालमा कोभिड खोप अभियान युद्ध स्तरमा चलिरहेको बताएका छन् । खोप अभियानमा सबै पक्षको उत्साहजनक सहभागिता भएका भएपनि जनप्रतितिधिहरु भने खोप लगाउन हिच्किचाइरहेको बताएका छन् ।
‘मैले आजमात्र ७७ वटै जिल्लाका प्रमुख जिल्ला अधिकारीसँग खोपको प्रभावकारिताका विषयमा भर्चुअल छलफल गरें,’ उनले भने, ‘त्यसमा सबै पक्षको उत्साहप्रद सहभागिता रह्यो तर जनप्रतिनिधीहरुको सहभागिता न्युन रहेको रिपोर्टिङ भएको छ ।’
यस्तै, उनले नर्सलाई न्युनतम पारिश्रमिक उपलब्ध गराउन निर्देशन दिएका छन् । सम्पूर्ण निजी अस्पतालहरुलाई नर्सको सरकारले तोके बमोजिम न्युनतम पारिश्रमिक उपलब्ध गराउन निर्देशन दिएका हुन् ।
२३ फागुनपछि समुदायस्तरमा खोप
मन्त्री त्रिपाठीले खोपको अभावमा खोप अभियान नरोकिने बताएका छन् । सरकारले २ दिनअघिमात्र २० लाख डोज खोप खरिदका लागि पैसा समेत पठाइसकेको छ । जसमा प्रति खोप ४ डलरका दरले पैसा पठाइएको उनले बताए ।
२३ फागुनबाट समुदायस्तरमा खोप अभियान सुरु हुने मन्त्री त्रिपाठीले जानकरी दिए । ‘सरकारले फागुन २३ गतेबाट समुदायस्तरमा खोप अभियान सञ्चालन गर्दैैछ,’ उनले भने, ‘सुरुमा ६० वर्षभन्दा माथि उमेरसमूहका मानिसलाई निःशूल्क खोप लगाइनेछ त्यसका लागि आवश्यक तालिम सुरु गरी सकिएको छ ।’
यसैगरी कोभ्याक्सको २२ लाख ५६ हजार डोज खोप ल्याउनका लागि कुरा भैरहेको उनले जानकारी गराए ।