काठमाडौं–कोभिड–१९ कारण बिरामीहरुका लागि अक्सिजनको चरम अभाव भएपछि फ्रान्सबाट १० वटा अक्सिजन प्लान्ट नेपाल ल्याइने तयारी अन्तिम चरणमा पुगेको छ । विभिन्न सामाजिक संस्था र व्यापारिक समूहको समन्वयमा झण्डै १२ करोड रुपैयाँ बराबरमा खरिद गरिएका १० वटा अक्सिजन प्लान्ट तीन साताभित्रै नेपाल ल्याइने गरी तयारी भइरहेको छ ।
प्रधानमन्त्री कार्यलय र स्वास्थ्य मन्त्रालयसँग समन्वयमा खरिद गरिएका ती अक्सिजन प्लान्ट सरकारले कार्गो विमानमार्फत ल्याउने तयारी गरेको छ ।
उक्त अक्सिजन प्लान्ट क्रियसन नेपाल, अमेरिका नेपाल मेडिकल फाउन्डेसन, मिसन रिबिल्ट नेपाल, ह्युम्यानिटी फाउन्डेसन नेपाल, बतास फाउन्डेसन, जगदम्बा स्टिल र स्याकार ट्रेडिङ कम्पनी प्रालिको पहलमा ल्याउन लागिएको हो । १० वटा मध्ये एक वटा अक्सिजन प्लान्टका लागि भने कोकाकोला फाउण्डेसनको सहयोग रहेको छ ।
उक्त १० वटा अक्सिजन प्लान्ट सातै प्रदेशका अस्पतालहरुलाई निःशुल्क उपलब्ध गराइने छ । त्यसका लागि प्राविधिक अध्ययन पनि ती संस्थाहरुले गरिरहेका छन् । अहिलेसम्म दार्चुला, धनगढी र पोखरामा अक्सिजन प्लान्ट राख्ने टुंगो लागेको छ भने अन्य ठाउँको टुंगो लागिसकेको छैन ।
