कोभिशिल्डको पहिलो डोज लगाएकालाई एस्ट्राजेनिकाकै खोप दिइने 

काठमाडौँ – स्वास्थ्य तथा जनसंख्या मन्त्रालयले कोभिशिल्डको पहिलो डोज लिएकालाई एस्ट्राजेनिकाकै दोस्रो डोज दिइने जनाएको छ । परिवार कल्याण महाशाखाले आइतबार एक सूचना प्रकाशित गर्दै कोभिशिल्डको विकल्पमा एकै प्रकृतिको एस्ट्राजेनिकाको खोप प्राप्त भए पछि यस्तो जानकारी दिएको हो ।

महाशाखाले १२ हप्ता पछि पनि सो खोपलाई दोस्रो मात्राको रुपमा लगाउने व्यवस्था मिलाउने बताउँदै धैर्यताकासाथ प्रतिक्षा गर्न भनेको छ ।

महाशाखाका निर्देशक डा. तारानाथ पोखरेलले हस्ताक्षर गरेको सूचनामा सेरम इन्सिच्युट अफ इन्डिया र कोभ्याक्स सुविधाको खोप उपलब्ध गराउन असमर्थ भएको पत्र प्राप्त भएकाले तोकिएकै मितिमा कोभिशिल्डको दोस्रो डोज दिन नसकिएको जनाइएको छ ।