२ साताभित्र साढे १३ लाख ज्येष्ठ नागरिकलाई कोभिशिल्डको दोस्रो डोज खोप दिइने

काठमाडौँ –  कोभिशिल्ड खोपको दोस्रो मात्रा लगाउन बाँकी रहेका जेष्ठ नागरिकहरुलाई अबको २ साताभित्र खोप दिइने भएको छ। आइतबार स्वास्थ्य मन्त्रालयमा आफ्नो सय दिनको कार्ययोजना सार्वजनिक गर्ने क्रममा स्वास्थ्य राज्यमन्त्री उमेश श्रेष्ठले २ साताभित्र खोप आउने र आएको ३ दिनभित्रमा १३ लाख ४८ हजार ज्येष्ठ नागरिकलाई खोप वितरण गरिने बताएका हुन्।

उनले भने, ‘कोभिशिल्डको दोस्रो डोज  खोप लगाउन बाँकी रहेका ज्येष्ठ नागरिकलाई कोभ्याक्समार्फत जापानले पठाउन लागेको  एस्ट्रेजेनेकाको खोप २ साताभित्र खोप आउँछ र आएको ३ दिनभित्रमा वितरण गर्ने प्रतिबद्दता व्यक्त गर्छु।’

कोभिड-१९ विरुद्ध खोप कोभिशिल्डको पहिलो मात्रा लगाएका ६५ वर्षभन्दा माथिका ज्येष्ठ नागरिकहरु भारतले दोस्रो दोज नपठाएपछि पर्खाइ बसिरहेका छन्।