विश्व स्वास्थ्य संगठनको महानिर्देशकमा डा. टेड्रोसलाई दोस्रो कार्यकालका लागि नेपालको समर्थन

काठमाडौं—विश्व स्वास्थ्य संगठन (डब्लूएचओ)मा महानिर्देशक डा. टेड्रोस एड्हानोम ग्रेहब्रेयससले दोस्रो कार्यकालका लागि दिएको मनोनयनमा नेपालले समर्थन गरेको छ । तीन दिने नेपाल भ्रमणका क्रममा बिहीबार काठमाडौं आइपुगेका डा. टेड्रोससँग मन्त्रालयमा भएको भेटघाटमा स्वास्थ्य तथा जनसंख्यामन्त्री विरोध खतिवडाले  उक्त जानकारी दिएका हुन् ।

‘नेपाल विश्व स्वास्थ्य संगठनमा यहाँले दिनुभएको सशक्त, व्यवहारिक र दूरदर्शी नेतृत्वको प्रशंशा गर्दछ । कोभिड—१९ महामारीको समयमा यहाँको भूमिका अझै महत्वपूर्ण थियो,’ मन्त्री खतिवडाले डा. ट्रेडोससँगको भेटमा भने, ‘दोस्रो कार्यकालका लागि यहाँको मनोनयनको हामी समर्थन गर्दछौं र यहाँलाई शुभकामना दिन्छौं ।’ सो क्रममा मन्त्री खतिवडाले नेपालको तर्फबाट सक्दो साथ र समर्थन रहने आश्वासन पनि दिए ।

मन्त्री खतिवडाले नेपाल सन् १९५३ मा डब्लूएचओमा आवद्ध भएदेखि नेपालको उत्कृष्ट कार्यत्मक सम्बन्ध रहेको उल्लेख गर्दै नेपाली जनताको स्वास्थ्य आवश्यकता सम्बोधन गर्न गरेको सहयोगको पनि प्रशंशा गरे । साथै, सन् २०१५ मा भूकम्पपछि स्वास्थ्य आपतकालको अवस्था रहँदा समेत विश्व स्वास्थ्य संगठनले विश्व स्वास्थ्य सम्मेलन—२०१५ को साइड इभेन्ट गर्न दिएकोमा पनि डब्लूएचओको नेपालले प्रशंशा गरेको छ ।