सेती अस्पताल बिरामी मृत्यु प्रकरण : क्षतिपूर्ति दिने सहमतिपछि आन्दोलन फिर्ता

धनगढी-सेती प्रादेशिक अस्पतालमा उपचारका क्रममा ज्यान गुमाएका गौरीगंगा नगरपालिका ६ का ४० वर्षीय गगनसिंह कुँवरको परिवारलाई क्षतिपूर्तिका लागि पहल गर्ने सहमतिपछि आन्दोलनका कार्यक्रम स्थगित गरिएको छ।

उपचारका क्रममा बिहीबार बिहान ज्यान गुमाएका कुँवरका परिवारलाई क्षतिपूर्तिका लागि सामाजिक विकास मन्त्रालयलाई सिफारिस गर्ने सहमतिपछि आफन्तहरुले आन्दोलनका कार्यक्रम फिर्ता लिएको अस्पतालका मेडिकल सुपरिटेन्डेन्ट डा. हेमराज पाण्डेले बताए।

उनले कुँवरको मृत्यु प्रकरणको छानविनका लागि समिति गठन गर्ने, उनका परिवारका सदस्यको निःशुल्क उपचारको व्यवस्था मिलाउने समझदारी पनि छलफलमा भएको जानकारी दिए। कुँवरको उपचारका क्रममा मृत्यु भएपछि विहानैदेखि मृतकका आफन्तले प्रदर्शन गरेका थिए। अहिले शव परिक्षण गर्ने तयारी भैरहेकाले त्यसपछि मात्रै आफन्तको जिम्मा लगाइने अस्पताल प्रमुख पाण्डेले बताए।

प्रदेशको सामाजिक विकास मन्त्रालयका प्रतिनिधीको रहोवरमा अस्पताल प्रशासन र मृतकका आफन्तबीच छलफल भएको थियो। आफन्तले डाक्टरको लापरवाहीले कुँवरको मृत्यु भएको भन्दै डाक्टरलाई कारवाही र लाइसेन्स खारेजीको माग गर्दै प्रर्दशन गरेका थिए।