काठमाडौं—भक्तपुरस्थित मध्यपुर अस्पतालको कार्यकारी अध्यक्षमा वरिष्ठ स्त्री तथा प्रसुती रोग विशेषज्ञ डा. रविना प्राधानांग चयन भएकी छन् । शनिबार अस्पतालको १४ औं वार्षिक साधारणसभाले १०० शैय्याको मध्यपुर अस्पतालको अध्यक्षमा सर्बसम्मत रुपमा डा. रविनालाई चयन गरेको हो ।
३४ वर्षकै उमेरमा मेडिकल निर्देशकमा रुपमा अस्पतालको मेडिकल नेतृत्व सम्हालेकी डा. रविना १४ वर्षदेखि अनवरत त्यही पोष्टमा क्रियाशील थिइन् । यो अवधिमा उनको कमाण्डमा अस्पताल ५० शैय्याबाट १०० शैय्यामात्रै भएन्, सेवा विस्तारका हिसाबले पनि अस्पतालले छलाङ मार्यो ।
भक्तपुर नगदेशकी डा. रविनाले मेडिकल नेतृत्वपछि अब अस्पतालको सम्पूर्ण व्यवस्थापकीय नेतृत्व समेत गर्ने भएकी छन् । उनले रसियाबाट सन् १९९९ मा एमबीबीएस गरेकी हुन् भने सन् २००६ मा रसियाबाटैं एमडी गरेकी हुन् ।
सन् २०१० मा ५० शैय्याबाट सेवा दिन थालेको मध्यपुर अस्पताल सन् २०२१ देखि १०० शैय्यामा संचालनमा छ । अस्पतालमा चिकित्सक, नर्स र अन्य गरी ४ सय कर्मचारी कार्यरत छन् ।
डा. रविनासँग धुलिखेल अस्पताल, लमजुङ अस्पताल च्छो रोल्पा हस्पिटल, परोपकार प्रसुति गृह काम गरेको अनुभव छ ।
