काठमाडौं—कोरोना भाइरस (कोभिड—१९) विरुद्धको भ्याक्सिन अमेरिकामा डिसेम्बरबाट सर्वसाधारणलाई दिन सुरु हुने सम्भावना रहेको बताइएको छ । समाचार एजेन्सीहरुकाअनुसार अमेरिकामा ११ डिसेम्बरदेखि अमेरिकामा भ्याक्सिन दिन सुरु हुनेछ ।
बेलायत, जर्मनीमा पनि डिसेम्बरबाट औपचारिक रुपमा भ्याक्सिन दिन सुरु गरिने एजेन्सीहरुले दावी गरेका छन् । यस्तै, भारतमा नयाँ वर्ष सन् २०२१ को तीन महिनाभित्र सर्वसाधारणका लागि दिने सम्भावना छ ।
कोरोना भाइरसको संक्रमण र मृत्युको आँकडामा सबैभन्दा पहिलो स्थानमा रहेको अमेरिकामा कोभिड—१९ विरुद्धको भ्याक्सिन टास्क प्रमुख मोन्सेफ सलोइले सीएनएनसँगको एक अन्तर्वार्तामा अमेरिकामा पहिलो व्यक्तिलाई डिसेम्बर ११ मा भ्याक्सिन दिइने बताएका छन् । उनले फुड एण्ड ड्रग एडमिनेष्ट्रेसन (एफडिए)ले अनुमति दिने बितिकै भ्याक्सिन दिन सुरु गरिनेछ ।
यसको तयारी पहिले नै पूरा भइसकेको बताइएको छ । ‘मलाई पूरा विश्वास छ कि ११ वा १२ डिसेम्बरसम्म अनुमति मिल्नेछ,’ उनले भने । १० डिसेम्बरमा एफडिएको महत्वपूर्ण बैठक बस्दैछ । यही बैठकले भ्याक्सिन लगाउन अनुमति दिने अपेक्षा गरिएको छ ।
यस्तै, स्पेनका प्रधानमन्त्री पेड्रो सान्चेनले देशमा भ्याक्सिनको काम जनवरीबाट सुरु गरिने बताएका छन् । उनले भने, ‘हामीले हाम्रातर्फबाट आवश्यक सबै महत्वपूर्ण तयारी गरिसकेका छौं । हामी जनवरीमा भ्याक्सिन दिने गरी हिडिरहेका छौ र तीन महिनामा पूरै देशलाई आवश्यक डोज दिइनेछ ।’ स्पेन र जर्मनी युरोपका पहिला यस्ता देश हुनेछन्, जहाँ भ्याक्सिन पूर्ण हुनेछ । देशमा कुल १३ हजार भ्याक्सिन प्वाइन्ट बनाइएका छन् ।
द गार्जियनसँगको कुराकानीमा जर्मनीका स्वास्थ्य मन्त्री जेन्स स्पान्हले भने, ‘युरोपमा जर्मनी र स्पेन यस्तो पहिलो देश हुन्, जसले भ्याक्सिनका लागि आवश्यक सबै तयारी पूरा गरिसकेका छन् ।’
