नेपाल अर्थोपेडिक्स अस्पताललाई डा. राजेश र होप वर्ल्डवाइड टिमद्धारा कम्बल सहयोग

काठमाडौं-जोरपाटीस्थित नेपाल अर्थोपेडिक्स अस्पताललाई डा. राजेश राजभण्डारी र होप वर्ल्डवाइडले कम्बल सहयोग गरेका छन् । बिहीबार नेपाल अर्थोपेडिक्स अस्पतालका कामु निर्देशक डा. कैलाश भण्डारीलाई डा. राजेश र होपले ५० थान कम्बल सहयोगस्वरुप हस्तान्तरण गरेका हुन् ।

उक्त कम्बल अस्पतालमा उपचार गर्नका लागि आउने गरिब तथा विपन्न बिरामीहरुका लागि प्रयोग गरिनेछ । ‘अस्पतालमा आएका विपन्न तथा गरिब बिरामीहरुका लागि आवश्यक पर्ने सामाग्री सहयोग गर्नुभएकोमा उहाँहरुलाई धन्यवाद दिन चाहन्छु’ डा. भण्डारीले भने, ‘यी कम्बल अस्पतालमा उपचार गराउन आउने गरिब तथा विपन्न बिरामीका लागि उपलब्ध गराउनेछौं ।’

नेपाल अर्थोपेडिक्स अस्पताल गैरनाफामूलक अस्पताल हो । यो अस्पताल सन् १९९८ मा खगेन्द्र नवजीवन केन्द्र र रोटरी इन्टरनेशनलले च्यारिटेबल भेन्चर्सका रुपमा स्थापना गरेका हुन् । अस्पतालले ट्रमा र अर्थोका सुपरस्पेसियालिटी सेवाहरु प्रदान गर्दै आएको छ ।