प्रदेश ५मा संक्रमितको उपचारमा समस्या, विज्ञापन गर्दा पनि आउँदैनन् डाक्टर

बुटवल – प्रदेश ५ मा एनेस्थेसिया र कन्सल्टेन्ट फिजिसियनको अभावका कारण कोरोना संक्रमितको उपचारमा समस्या देखिएको छ । प्रदेश ५ का सामाजिक विकास मन्त्रालयका सूचना अधिकारी डा. पुष्पराज पौडेलका अनुसार अहिलेसम्म सरकारी अस्पतालका डाक्टर र कतै मेडिकल कलेजले अल्पकालीन रूपमा पठाएका डाक्टरबाट आइसीयू बेडमा भर्ना भएका संक्रमितको उपचार भइरहेको छ ।

विकासमन्त्री सुदर्शन बराल भन्छन्, ‘आइसीयु उपकरण र बेड त पैसाले किनेर थप्न सकिएला तर एनेस्थेसिया र कन्सल्टेन्ट फिजिसियनहरू आवेदन खोल्दा पनि आएका छैनन्, यो ठूलो समस्या भएको छ ।’

उनका अनुसार अहिले कम्तीमा ८ जना एनेस्थेसिस्ट र ३० जना एमडी गरेका कन्सल्टेन्ट फिजिसियन चाहिएको छ । त्यसका लागि दोस्रोपटक विज्ञापन गर्न लागेको उनले बताए । चारवटा कोरोना विशेष अस्पतालका लागि प्रदेश सरकारले ५८३ जना जनशक्ति नियुक्त गर्न र ती जनशक्तिलाई तीन महिनाका लागि तीन करोड ९६ लाख ३२ हजार रुपैयाँ तलबभत्ता निकासा समेत गरेको मन्त्री बरालले बताए ।