रित्तिए जुम्लाका क्वारेन्टाइन, आइसोलेसन एक जना मात्रै संक्रमित

जुम्ला -एकताका भरिभराउ बनेका जुम्लाका क्वारेन्टाइन रित्तिएका छन् । बिहिबार तातोपानी गाउँपालिमा एक महिला तीन पुरुष गरी चार जना घर फर्किएपछि सो क्वारेन्टाइन रित्तिएका हुन् ।

जुम्लाका ८ स्थानीय तहमा ८०० भन्दा बढी बेडको क्षमता भएका क्वारेन्टाइनमा दुई हजार ७१९ जना बसेका थिए । अहिले सबै जना घर फर्किसकेका छन् ।

यता, आइसोलेसनमा पनि मात्र एक जना संक्रमित रहेका छन् । कर्णााली स्वास्थ्य विज्ञान प्रतिष्ठान शिक्षण अस्पतलको १२० बेड क्षमताको आइसोलेसनमा ६९ जना कोरोना भाइरस संक्रमित मध्ये एक जना मात्रै रहेको प्रतिष्ठान रजिष्ट्रार विश्वराज काफ्लेले बताए । उनले भने,  ‘६८ जना निको भएर घर फर्किएका छन् ।’ लकडाउन खुलेसँग जुम्ला कोरोना मुक्त हुने सम्भावना देखिएको उनले बताए ।

जिल्ला बाहिरबाट आएका १२ हजार १२९ जना मध्ये ४ हजार ८ सय ५७ जनाको स्वाब परीक्षण गरिएको हो । त्यसैगरी, ४ सय ७९ जनाको आरडिटी परीक्षण गरिएको सहायक प्रमुख जिल्ला अधिकारी ओमप्रकाश देवकोटाले बताए ।