प्रदेश १ मा एकैदिनमा २२ सय जनाको कोरोना परीक्षण, झापामा पनि सुरू

विराटनगर – प्रदेश १ मा कोरोना परीक्षणको दायरालाई फराकिलो बनाइएको छ । शुक्रबार एकैदिन २ हजार दुई सय पाँच जनाको कोरोना परीक्षण भएको छ । प्रदेश १ मा एकैदिन वृहत संख्यामा परीक्षण भएको यो पहिलोपटक हो ।

शुक्रबार प्रदेश १ मा ९५ जना कोरोना संक्रमित देखिएका छन् । ३५ जना कोरोनामुक्त भएका छन् । हालसम्म प्रदेश १ मा ६२ हजार ६ सय ५१ जनाको कोरोना परीक्षण भएको मुख्यमन्त्री तथा मन्त्रिपरिषद्को कार्यालयले जनाएको छ । हालसम्म १ हजार ८ सय २१ जनालाई कोरोना संक्रमण पुष्टि भएको छ भने निको हुनेहरुको संख्या एक हजार ७५ रहेको छ ।

मेची अस्पतालबाट पिसिआर परीक्षण सुरु

शुक्रबारदेखि मेची अञ्चल अस्पताल झापाबाट पीसीआर परीक्षण सुरु भएको छ ।  झापाबाट पिसिआर परीक्षण सरु भएसँगै परीक्षणको संख्या पनि बढेको छ । यसअघि वीपी कोइराला स्वास्थ्य विज्ञान प्रतिष्ठान धरान, कोशी अस्पताल र प्रदेश प्रयोगशाला विराटनगरबाट मात्र पिसिआर परीक्षण हुँदै थियो ।