थप एक जना संक्रमितको मृत्यु, पर्सामा मृतकको संख्या ४५ पुग्यो

जनकपुर – कोरोना संक्रमणबाट पर्सामा थप एक पुरुषको मृत्यु भएको छ । पर्साको पोखरिया नगरपालिका १ निवासी ७७ वर्षका संक्रमित पुरुषको नेशनल मेडिकल कलेज अस्थायी कोरोना विशेष अस्पताल बीरगंजमा उपचारको क्रममा बिहीबार राति मृत्यु भएको हो ।

असोज ७ गते उपचारको लागि नारायणी अस्पतालमा भर्ना भएका मृतक पुरुषको स्वाब संकलन गरि परीक्षण गरिएकोमा उनमा कोरोना संक्रमण पुष्टि भएको थियो । कोरोना संक्रमण देखिएपछि उनलाई उपचारको लागि नेशनल मेडिकल कलेज अस्थायी कोरोना विशेष अस्पतालमा भर्ना गरिएको थियो ।

मृतक मुटु र मिर्गौलाको समस्याबाट पीडित थिए । उनलाई उपचार गर्न भेन्टिलेटरमा समेत राखिएको थियो । भेन्टिलेटरमा राखेर औषधि दिएर उपचार गर्दा समेत संक्रमित पुरुषको गएराति मृत्यु भएको अस्पतालका फोकल पर्सन डाक्टर असरफ हुसैनले वताए । यससँगै पर्सामा कोरोना संक्रमणका कारण मृत्यु हुनेको संख्या ४५ पुगेको छ ।