सप्तरीका संक्रमितको धरानमा मृत्यु

जनकपुर – सप्तरीका एक कोरोना संक्रमितको धरानमा मृत्यु भएको छ । सप्तरीको राजविराज नगरपालिका वडा नम्बर ३ का ७१ वर्षीय पुरुषको उपचारका क्रममा शुक्रबार धरानस्थित बिपी कोइराला स्वास्थ्य विज्ञान प्रतिष्ठानमा मृत्यु भएको जिल्ला स्वास्थ्य कार्यालयका प्रमुख दुनियालाल यादवले बताए ।

मृतक बृद्धमा भदौ २५ गते कोरोना संक्रमण पुष्टि भएका थिए । मृतक वृद्ध रक्तचापका बिरामी रहेका थिए । मृतक बृद्धको अवस्था विग्रिएपछि १२ दिन अगाडी उपचारका लागि बीपी कोइराला स्वास्थ्य प्रतिष्ठान धरानमा भर्ना गरिएको थियो ।

मृतक वृद्धको शव गृह जिल्ला ल्याउने तयारी भइरहेको अस्पतालका प्रमुख यादवले बताए । यससँगै सप्तरीमा संक्रमणबाट मृत्यु हुने संख्या १३ पुगेको स्वास्थ्य कार्यालय सप्तरीले जनाएको छ ।