स्वास्थ्य मन्त्रालयले भन्यो, ‘७२ प्रतिशतलाई कोभिड खोप दिने गरी तयारी भैरहेको छ’

काठमाडौं– स्वास्थ्य तथा जनसंख्या मन्त्रालयले ७२ प्रतिशत नेपालीलाई कोभिड–१९ विरुद्धको खोप दिने गरी तयारी अगाडि बढिरहेको जनाएको छ । मन्त्रालयका प्रवक्ता डा. जागेश्वर गौतमका अनुसार कोभिड–१९ खोप सम्बन्धि प्राविधिक सुझाव दिन विज्ञ सल्लाहकार समिति बनाएर काम अघि बढिरहेका छन् ।

मन्त्रालयले खोपको द्रुत कार्ययोजना अघि बढाउँदै विभिन्न आठ कार्यक्षेत्रहरु खोप सचिवालयको गठन, खोपको प्राविधिक कार्यपत्रलाई पूर्णता दिने, पूर्वाधार एसेस्मेन्ट, आवश्यकता आँकलन, सेवाग्राहीको व्याख्या सहितको प्राथमिकीकरण, डिप्लोएमेन्ट प्लान, खोप कोषको प्रस्ताव आह्वान, सञ्चालन, सार्वजनिक सूचना प्रवाह निर्देशिका साझेदारसँगको संवाद, अनुगमन नियमन अनुसन्धान तथा क्लिनिकल व्यवस्थापन पहिचान गर्न कार्यदल बनाएर काम गरिरहेका जनाएको छ ।