गण्डकी सरकारलाई ५० थान कन्सन्ट्रेटर सहयोग

पोखरा–गण्डकी प्रदेश सरकारलाई ५० थान अक्सिजन कन्सन्ट्रेटर प्रदान गरिएको छ । संयुक्त राष्ट्रसंघीय विकास कार्यक्रम (युएनडिपी)ले गण्डकी प्रदेश सरकारमार्फत आवश्यकताका आधारमा वितरण गर्ने गरी अक्सिजन कन्सन्ट्रेटर सहयोग गरेको हो ।

युएनडिपीले कोभिड–१९ को पहिलो लहरमा पनि भेन्टिलेटरलगायत स्वास्थ्य सामग्री वितरण गरेको प्रमुख अर्यालले जानकारी दिए । अक्सिजन कन्सन्ट्रेटर कोभिड–१९ का बिरामीको उपचारमा सहयोगी हुने भएकाले सहयोग गरिएको उनले बताए ।

ती सामाग्री आवश्यकताका आधारमा प्रदेशका विभिन्न अस्पतालमा वितरण गरिनेछ । सामग्री हस्तान्तरण कार्यक्रममा गण्डकी प्रदेश स्वास्थ्य निर्देशक विनोदविन्दु शर्मा, सहसचिव शम्भु ज्ञवाली, युएनडिपीका प्रकृति जिसी र सरीता धौभडेल तथा डब्लुएचओका भानु याङ्देन उपस्थित थिए ।