च्छो–रोल्पा अस्पतालमा इन्डोस्कोपी शिविर

चरिकोट—दोलखाको चरिकोटमा सञ्चालित च्छो–रोल्पा जनरल अस्पताल प्रालिमा इन्डोस्कोपी तथा शल्यक्रिया शिविर सम्पन्न भएको छ । टिचिङ अस्पतालका विशेषज्ञ डा. रोमी दाहालको नेतृत्वमा भएको शिविरमा २१ जनाले इन्डोस्कोपी सेवा लिनु भएको अस्पतालका मेडिकल डाइरेक्टर डा. विनोद दंगालले जानकारी दिए ।

जिल्लामै पहिलो पटक न्यून शुल्कमा सुरु गरिएको सेवाले दोलखालगायत आसपास जिल्लाका सेवाग्राहीलाई सेवा पुगेको डा. दंगाल बताए ।

शिविरमा एपेन्डिक्सको समस्या भएका दुई जनाको जटिल शल्यक्रिया समेत गरिएको छ ।

शिविरमा एनेस्थेसियोलोजिष्ट डा. तुलसीराम श्रेष्ठ, स्वास्थ्य प्राविधिक हिमाल श्रेष्ठ, नर्स गंगा के.सी.लगायतको सहभागिता रहेको थियो ।

न्यून शुल्कमा हरेक महिनाको अन्तिम शनिबार इन्डोस्कोपी सेवा प्रदान गर्ने अस्पताल प्रशासनले जनाएको छ ।