नर्सिङ कलेजको होस्टेलको पाँच तला माथिबाट हाम फालेकी १९ वर्षीया छात्राको मृत्यु

चरिकोट—दोलखाको चरिकोटमा सञ्चालित च्छो रोल्पा नर्सिङ कलेजको होस्टेल बस्दै आएकी एक छात्राको मृत्यु भएको छ ।  होस्टेलको पाँच तलामाथिबाट हाम फालेर गम्भीर घाइते भएकी छात्राको उपचारको क्रममा बुधबार राति मृत्यु भएको हो ।

पोखरा घर भई च्छो रोल्पा नर्सिङ कलेजमा अध्ययनरत अन्दाजी १९ वर्षीया करुणा अधिकारीको उपचारको क्रममा गए राति मृत्यु भएको हो । उनलाई च्छो रोल्पा अस्पतालमा सामान्य उपचारपछि भक्तपुर रिफर गरिएको थियो ।

तर, गए राति भक्तपुरस्थित मध्यपुर थिमी अस्पतालमा उपचारको क्रममा मृत्यु भएको दोलखाका प्रहरी निरीक्षक जीवन श्रेष्ठले जानकारी दिए । ती छात्राले बुधबार नै होस्टलको पाँच तलामाथिबाट हाम फालेर आत्महत्याको प्रयास  गरेको उनले बताए । विदामा घर गएकी उनी बुधबार मात्रै चरिकोट फर्किएकी थिइन् ।

घरबाट आएको एक दिनमै उनले होस्टलको पाँचौ तलबाट हाम फालेकी हुन् । ती युवतीले डिप्रेसनको औषधिसमेत सेवन गर्दै आएकी अभिभावकले बताएका थिए । अहिलेसम्म उनले हाम फाल्नुको कारण भने खुलेको छैन ।