काभ्रेको तेमालमा आँखा शिविर, ६९ जनाको निःशुल्क शल्यक्रिया

बनेपा—काभ्रेको तेमाल गाउँपालिकामा निःशुल्क आँखा शिवर सम्पन्न भएको छ । नेपाल आँखा कार्यक्रम तिलगंगा आँखा प्रतिष्ठान र ख्वप तिलगंगा आँखा अस्पताल भक्तपुरको संयुक्त आयोजना तथा अन्धोपना उपचार परियोजनाको सहयोगमा २४ र २५ मंसिरमा पोखरीनारायण स्थान स्वास्थ्य चौकीमा मोतिबिन्दु तथा अन्य रोगका बिरामीहरूको लागि निःशुल्क सल्यक्रिया शिविर सम्पन्न भएको हो ।

शिविरमा ६३ जना मोतिबिन्दुका बिरामी र छ जना आँखामा मासु पलाएका बिरामीहरू गरी ६९ जना बिरामीहरुको निःशुल्क शल्यक्रिया गरिएको थियो । नेपाल आँखा कार्यक्रम ख्वप तिलगंगा आँखा अस्पतालका प्रमुख डा. सुदीपराज भण्डारीको नेतृत्वमा भएको हो ।

शल्यक्रिया गरिएका ६९ जना बिरामीहरूलाई आवश्यक पर्ने औषधि, कालो चश्मा र आवस्यक सामग्रीसहित पुनः एक सातामा पोखरी नारायणस्थानमा रहेको तिमाल ग्रामीण आँखा केन्द्रमा फलोअप आउनको भनिएको छ ।

शल्यक्रिया शिविरमा ४४ वर्षदेखि ८८ वर्षसम्मका उमेर समूहले सेवा लिएका थिए ।