जुम्ला–जुम्लाको तातोपानी गाउँपालिकाले एकपछि अर्काे गाउँ सिल गर्दै गएको छ । गाउँ–गाउँमा कोभिड–१९ संक्रमणले भयावह रुप लिएपछि गाउँपालिकाले गाउँ नै सिल गर्न थालेको हो ।
गाउँपालिका–१ राँकागाउँमा कोभिड–१९ संक्रमित बढेपछि गाउँ नै सिल गरिएको छ । पहिलो पटक मंगलबार २५ जनाको कोभिड–१९ परीक्षण गर्दा २३ जनामा कोभिड–१९ पुष्टि भएपछि मंगलबार बेलुकादेखि १० दिनका लागि राँकागाउँ सिल गरिएको हो ।
गाउँमा रुघाखोकी, ज्वरो आउने र खोकी लाग्ने समस्या देखिन थालेपछि गाउँपालिकाको स्वास्थ्य शाखाले कोभिड–१९ परिक्षण गरेको थियो । यसअघि सोही गाउँपालिका–६ रावतवाडा पनि एक साता सिल गरिएको थियो । १३६ जनाको कोभिड–१९ परीक्षण गर्दा २१ जनामा संक्रमण पुष्टि भएको थियो ।
जनस्वास्थ्य सेवा कार्यालय जुम्लाको टोली गाउँमै गएर एन्टीजेन परिक्षण गर्दा एकै दिनमा २३ जना संक्रमित भेटिएपछि गाउँ नै त्रसित भएको छ । स्वास्थ्य संयोजक गुरुप्रसाद चौलागाइँले भने, ‘गाउँमा बिरामी धेरै छन् । एक÷दुई दिन भित्र सबैको टे«सिङ र टेस्टिङ गर्ने तयारी भइरहेको छ ।’
उनले केही बिरामी परीक्षण गर्न आउन नमानेको बताए । संक्रमित सबैलाई पहिले निर्माण गरिएको क्वारेन्टिनमा आइसोलेसन बेड बनाएर राखिएको उनले जानकारी दिए । आइसोलेसनमा स्वास्थ्यकर्मी तथा चिकित्सकको निगरानी छ । संक्रमितमध्ये दुई तीन जना दम र मुटु रोगी छन् ।
संक्रमण पुष्टि भइसकेपछि चिकित्सकले अक्सिजनको मात्रा जाँच गरेका थिए । ‘अवस्था ठिकै थियो,’ उनले भने, ‘अवस्था क्रिटिकल हुने वित्तिकै कोभिड अस्पतालमा लैजाने तयारी भइरहेको छ । गम्भीर अवस्था आइपुगेको खण्डमा कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा लगिनेछ ।’
राँका गाउँमा बाहिरका व्यक्ति प्रवेश गर्न पाउने छैनन् । गाउँ भित्रका व्यक्ति पनि बाहिरका गाउँबस्तीमा जान पाउने छैनन् । तातोपानी गाउँपालिकाको संस्थागत आइसोलेसनमा ४७ जना संक्रमित छन् । चार जना होम आइसोलेसनमा छन् । १९ जना संक्रमित निको भएर घर फर्किसकेका छन् ।
संक्रमितमध्ये ६० प्रतिशत संक्रमितको अवस्था सामान्य छ । संक्रमित थपिदै गर्दा आइसोलेसन बेड बढ्न थप्नुपर्ने अवस्था रहेको स्वास्थ्य शाखाले जनाएको छ ।
पहिलो चरणमा माइकिङ गरेर स्वास्थ्य सुरक्षाको मापदण्डको पालना गर्न सचेत गरिएको थियो । उनले भने, ‘त्यो कार्यले खासै प्रवभाव पार्न सकेन । सम्बन्धित वडाले सचेत नगर्दा सम्म केही हुनेवाला छैन ।’
तातोपानीको कोभिड अस्पतालमा १० वटा अक्सिजन सिलिण्डर छन् । गाउँपालिका भित्रका गाउँमा कोभिड–१९ लक्षणका बिरामी भेटिने बित्तिकै परीक्षण गराएर व्यवस्थापन गर्ने गरिएको संयोजक चौलागाईंले बताए । उनले भने, ‘गाउँमा कोभिड तीब्र रुपमा फैलिइरहेको अवस्था छ । स्थानीय सचेत हुन जरुरी छ । स्वास्थ्य सुरक्षाको मापदण्ड पालना गर्न आवश्यक रहेको छ ।’ तातोपानी गाउँपालिकाले कोभिड–१९ लक्षित कार्य गरिरहेकोले शंका लाग्ने बित्तिकै खबर गर्न आग्रह गरिएको छ ।
