काठमाडौं—विश्व स्वास्थ्य संगठनले क्यान्सरको उपचार गराइरहेका व्यक्तिहरु कोरोना भाइरस (कोभिड–१९) को उच्च जोखिममा रहेको बताएको छ । दीर्घ रोगका बिरामीमध्ये रोग प्रतिरोधी क्षमता ज्यादै कम भएकाले क्यान्सरका बिरामी बढी जोखिममा छन् ।
क्यान्सर रोग विशेषज्ञहरुका अनुसार करिब ३० हजारको संख्यामा क्यान्सरका रोगका बिरामी नेपालमा छन् । तर, नियमीत उपचार सेवा लिनेमा १९ हजार ४ सय ६० रहेको सरकारी तथ्यांकले देखाएको छ । हरेक वर्ष सोही अनुपातमा क्यान्सरका बिरामीले सेवा लिने गरेका छन् ।
काठमाडौं क्यान्सर सेन्टरका प्रमुख डा. अन्जनीकुमार झाका अनुसार कोभिड—१९ त्रासका साथै लकडाउनले क्यान्सर रोगीहरुको उपचारमा समस्या भएको छ । तर, सेवामा लिन आएका बिरामीहरुको हकमा भने कुनै समस्या नभएको उनी बताउँछन् । उपत्यकामा काठमाडौ क्यान्सर सेन्टर, भक्तपुर क्यान्सर अस्पताल र हरिसिद्धी अस्पतालले सेवा दिदैं आएका छन् ।
नेपाल चिकित्सक संघका पूर्व अध्यक्षसमेत रहेका डा.झाका अनुसार हाल सेवा लिन आउनेमा बच्चा दानीको मुखमा हुने क्यान्सर, घाँटीको क्यान्सर र स्तन क्यान्सर बढी छ । ‘कतिपय बिरामीहरु पास मिलाएर उपत्यका बाहिरबाट समेत सेवा लिन आएका छन् । तर, अधिकांश बिरामी कोरोनाको त्रासले सेवा छाडेर बसेका छन् । नियमित जाँचका लागि आउनैपर्नेहरु पनि आउन सकेका छैनन्,’ उनले भने ।
क्यान्सरका बिरामीहरु जो उपचार आवश्यक छ, उनीहरुका लागि केमोथेरापी, रेडियोथेरापी, ब्राकी (भित्री भाग सेक्ने) थेरापी दिइरहेका छन् । ब्राकी थेरापी काठमाडौं क्यान्सर सेन्टरले मात्रै दिदै आएको छ । नियमित ६० जना बिरामी आउने सेन्टरमा हाल ३५ जना नियमित सेवा लिन आएका डा. झाले बताए । ‘उपत्यका बाहिरबाट आएकाहरुलाई पिसिआरको रिपोर्ट मगाएका छौं,’ उनले भने, ‘सम्भव नभएको अवस्थामा लक्षणका आधारमा पनि परीक्षण गरिएको छ ।’
