धनगढी—सुदूरपश्चिम प्रदेशका ४८ संक्रमितको विभिन्न अस्पतालमा उपचार भइरहेको छ । बाँकी दुई हजार दुई सय बढी स्थानीय तहको आइसोलेसनमा उपचाररत छन् ।
मन्त्रालयका अनुसार महाकाली अस्पतालमा १८ जना, टीकापुर अस्पतालमा १३ जना, जिल्ला अस्पताल अछाममा १० जना, मालाखेती अस्पतालमा तीन, सेती अस्पताल र डोटी अस्पतालमा दुई/दुई जना गरी ४८ जनाको उपचार भइरहेको छ ।
४३ प्रतिशत कोरोना संक्रमित डिस्चार्ज
सुदूरपश्चिम प्रदेशमा ४२.९७ प्रतिशत संक्रमित डिस्चार्ज भएका छन् । प्रदेशका विभिन्न अस्पताल र स्थानीय तहमा बनाइएका आइसोलेसनबाट एक हजार ६ सय ६८ कोरोना संक्रमित डिस्चार्ज भएका छन् ।
प्रदेशको सामाजिक विकास मन्त्रालयका स्वास्थ्य महाशाखा प्रमुख नरेन्द्र कार्कीले नियमित प्रेस ब्रिफिङमा शुक्रबार साँझ एक हजार ६ सय ६८ जना कोरोना संक्रमित डिस्चार्ज भएको जानकारी दिए ।
उनका अनुसार बिहिवार मात्रै कैलालीका ९ जनालाई घर पठाइएको छ । सामाजिक विकास मन्त्रालयका अनुसार अहिलेसम्म सबैभन्दा बढी कञ्चनपुरका तीन सय ९०, अछामका तीन सय ६२, डडेल्धुराका दुई सय ६७ र बैतडीका दुई सय ५२ जनालाई डिस्चार्ज गरिएको छ ।
डोटीका एक सय ५७ जना, कैलालीका एक सय ३८ जना, बझाङबाट ८७ जना, दार्चुलाबाट १३ जना र बाजुराबाट दुई जना संक्रमितलाई डिस्चार्ज गरिएको छ ।
संकलित नमुनामध्ये १५१० को रिपोर्ट आउन बाँकी
सुदुरपश्चिम प्रदेशमा पिसिआर परीक्षणको लागि २९ हजार ७ सय ८७ नमुनामध्ये एक हजार पाँच सय १० जनाको रिपोर्ट आउन बाँकी रहेको स्वास्थ्य निर्देशनालयले जनाएको छ । सुदूरपश्चिम प्रदेशमा शुक्रबारसम्म संक्रमितको संख्या तीन हजार ८ सय ८१ पुगेको छ ।
