काठमाडौं उपत्यकामा ४९ सहित देशभर थप ८० जनामा कोरोना पुष्टि

काठमाडौं– काठमाडौं उपत्यकामा ४९ जना सहित देशभर थप ८० जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार पछिल्लो २४ घन्टामा थप ८० जनामा कोरोना संक्रमण पुष्टि भएको हो ।

पुष्टि भएको मध्ये काठमाडौं उपत्यकाका ४९ जना रहेका छन् । जसमध्ये काठमाडौंमा ३६ जना, ललितपुरमा ११ जना र भक्तपुरमा २ जनामा कोरोना संक्रमण पुष्टि भएको हो ।

नेपालमा हाल १ हजार ४ सय ९४ जना सक्रिय संक्रमित रहेका छन् । जसमध्ये ९ सय ९६ जना संस्थागत आइसोलेसनमा छन् भने ४ सय ९८ जना होम आइसोलेसनमा रहेका छन् ।

पछिल्लो २४ घन्टामा संक्रमण मुक्त भई १ सय २१ जना डिस्चार्ज भएका छन् । हालसम्म नेपालमा कोरोना मुक्त हुनेको संख्या २ लाख ६९ हजार ८ सय ७६ पुगेको छ ।

नेपालमा हाल ५२ जना कोरोना संक्रमितको आइसीयू र १० जनाको भेन्टिलेटरमा उपचार भैरहेको मन्त्रालयले जनाएको छ ।