डा. सन्दुक रुइत पद्यश्री गौरव पुरस्कारबाट सम्मानित

काठमाडौं-वरिष्ठ नेत्र रोग विशेषज्ञ डा. सन्दुक रुइतले पद्यश्री गौरव पुरस्कारबाट सम्मानित भएका छन् । आइतबार खेमलाल-हरिकला लामिछाने प्रतिष्ठानद्वारा पहिलो ‘पद्मश्री गौरव पुरस्कार’ डा. रुइतलाई प्रदान गरिएको हो ।

प्रतिष्ठानका अध्यक्ष जीवा लामिछानेले उक्त पुरस्कार डा. रुइतलाई प्रदान गरेका हुन् ।

गत वर्ष प्रतिष्ठानले नयाँ पुरस्कारका रुपमा पद्मश्री गौरव पुरस्कारको घोषणा गरेको थियो । समाजलाई गौरवपूर्ण योगदान दिने विभिन्न क्षेत्रका विशिष्ट व्यक्तित्वलाई पद्मश्री गौरव पुरस्कारद्वारा सम्मानित गरिने प्रतिष्ठानले जनाएको छ।

सोहीअनुरुप पहिलो पटक पद्मश्री गौरव पुरस्कार लाखौं मानिसलाई संसार देख्न सहयोग गर्ने डा. रुइतलाई पुरस्कार प्रदान गरिएको हो । पूर्वी नेपालको ताप्लेजुंगको दुर्गम हिमाली गाउँमा जन्मिएका डा. रुइतकै नेतृत्वमा प्रतिष्ठित तिलगंगा आँखा अस्पताल स्थापना भएको हो ।

सरल र कम खर्चमा मोतीविन्दुको शल्यक्रिया गरिने पद्धति ‘रुइतेक्टोमी’का लागि डा. रुइत विश्वमै परिचित छन् ।