धनगढी—धनगढीको स्वस्तिक अस्पतालमा मिर्गौलाको पत्थरीको शल्यक्रिया गरेका एक जनाको मृत्यु भएको छ । शनिबार अस्पताल भर्ना भएका कञ्चनपुरको बेलौरी नगरपालिका–१० शिवनगरका ५५ वर्षीय ऐजनलाल चौधरीको मृत्यु भएको अस्पतालले जनाएको छ ।
चौधरीको अस्पतालले शल्यक्रिया गरेर बाँया मिर्गौलाजमेको ११ एमएम र ९ एमएमका दुई वटा स्टोन निकालेको थियो । सोही क्रममा अत्याधिक रक्तश्राव भएको थियो । रक्तश्राव नरोकिएपछि अस्पतालका जर्नल सर्जन डा. जोनस तिवारीले मृतकका परिवारलाई मिर्गौला झिक्नुपर्ने बताएका थिए ।
मृतकका भतिजा राजकुमार चौधरीले डाक्टरले मिर्गौला चाहिन्छ कि मान्छेको ज्यान भनेपछि आफूूहरुले मिर्गौला झिकेर भएपनि ज्यान जोगाइदिन आग्रह गरेको बताए । तर, डाक्टरले मिर्गौला निकालेपछि भने मृत्युको खबर सुनाएको बताउँदै चौधरीले लापरवाही गरिएकाले कारवाहीको माग गरेका छन् ।
अस्पतालका सञ्चालक महेश जोशीले पत्थरीको शल्यक्रिया गर्ने क्रममा रक्तश्राव नरोकिएपछि डाक्टरले मिर्गौला झिकेको बताए । मिर्गौला झिकेपछि रक्तश्राव रोकिएपनि बिरामीको अवस्था सुधार नभएको बताउँदै भेन्टिलेटरमा राखेर उपचार गर्दा समेत बचाउन नसकिएको जोशीले बताए ।
स्वस्तिक कार्डियो हस्पिटलले संचालन स्वीकृती समेत नपाएको पाइएको छ । स्वास्थ्य निर्देशनालयबाट २५ शैय्याको अस्पतालको अनुमति प्रक्रियामा रहेको स्वास्थ्य निर्देशनालयले जनाएको छ । अस्पताल दर्ता प्रक्रियाका लागि फाइल आएको र संचालन अनुमति नदिइएको स्वास्थ्य निर्देशनालयले राजपुर डोटीले जनाएको छ
