धनगढीमा नर्स मृत फेला : पोष्टमार्टमपछि भिसेरा परिक्षण गरिदै

कैलाली-धनगढीमा स्टाफ नर्स सोनम ऐर मृत भेटिएको घटनामा शवको पोष्टमार्टपछि भिसेरा परिक्षणका लागि पठाइएको छ। पोष्टमार्टले मात्रै घटनाको अनुसन्धान गर्न असहज भएपछि भिसेरा परिक्षणका लागि पठाइएको हो ।

जिल्ला प्रहरी कार्यालय कैलालीका अनुसार पोष्टमार्ट रिपोर्ट आएपनि त्यसमा हत्याको आशंका गरिएको छैन्। ‘पोष्टमार्टम रिपोर्टमा हत्या भएको हुन सक्ने देखिएको छैन्,’ जिल्ला प्रहरी कार्यालय कैलालीका प्रहरी निरिक्षक प्रकाश कार्कीले भने, ‘रिपोर्टमा शरीरमा चोटपटक लागेको देखिएको छैन्। उनीमाथि जबरजस्ती भएको पनि देखाएको छैन्। तर अहिले नै हत्या वा आत्महत्या के हो ? भन्न सकिदैन्।’

उनले नेपाल प्रहरीको विधिविज्ञान प्रयोगशालामा भिसेरा परिक्षणको लागि पठाइएको बताए। ऐरको मृत्युको सम्बन्धमा अझ थप अनुसन्धान भिसेरा परिक्षणबाट गर्न लागिएको उनले बताए।

उक्त घटनाको निष्पक्ष अनुसन्धानको माग गर्दै आफन्तले प्रहरीमा उजुरी दिइसकेका छन् । कञ्चनपुरको शुक्लाफाँटा नगरपालिका १० घर भएकी ऐर आइतबार बिहान धनगढीको हसनपुरस्थित डेरामा मृत अवस्थामा फेला परेकी थिइन् । ऐर धनगढीको निसर्ग हस्पिटल र नवजीवन अस्पतालमा कार्यरत थिइन् ।