सेनाको हेलिकोप्टरमार्फत सिकिस्त बिरामीको डडेल्धुराबाट उद्धार

काठमाडाैं-नेपाली सेनाको हेलिकोप्टरमार्फत बिचल्लीमा परेकी एक बिरामीको डडेल्धुराबाट उद्धार गरेको छ । बिहीबारदेखिको हिमपातका कारण सुदूपश्चिम प्रदेशका पहाडी जिल्लाका विभिन्न राजर्माग अवरुद्ध भएपछि अलपत्रमा परेकी एक सिकिस्त बिरामीको उद्धार गरिएको हो ।

बिहीबार दिउँसो भिरबाट खसेर अचेत अवस्थामा रहेकी दार्चुलाको लेकम गाउँपालिका ४ की ३८ वर्षीया माधवी पालको सुदूरपश्चिम प्रदेश समाजिक विकास मन्त्रालयले खर्च व्यहोर्ने गरि उद्धर गरेको डडेल्धुराका प्रमुख जिल्ला अधिकारी राजुप्रसाद पौडेले जानकारी दिए ।

पाललाई थप उपचारको लागि बाँके जिल्लाको कोहलपुर अस्पतालमा लगिएको प्रमुख जिल्ला अधिकारी पौडेले बताए । माधवीलाई दार्चुला अस्पताल, पाटन अस्पतालमा हुँदै डडेल्धुरा अस्पतालमा शुक्रबार साँझ भर्ना गरिएको थियो ।

उनको टाउकोमा गम्भीर चोटरहेको अस्पताल स्रोतले जनाएको छ । पहिले नै हात भाँचिएको र त्यसै पनि बाख्राको गोठालो रहेको समयमा भिरबाट लडेर अचेत नै रहेको ३ दिन भएको उनका श्रीमान नवलबहादुर पालले बताए ।