सफाइकर्मीबाट संक्रमितको ज्वरो नाप्न लगाउने स्वास्थ्यकर्मीलाई आइसोलेसनबाट हटाइयो

जनकपुर – धनुषाको नगराइन नगरपालिका ५ गंगुलीमा संचालनमा रहेको आइसोलेसनमा कोरोना संक्रमितको ज्वरो सफाइकर्मीबाट नाप्न लगाएका स्वास्थ्यकर्मीमाथि कारबाही हुने भएको छ । सफाइकर्मीबाट कोरोना संक्रमितको ज्वरो नाप्न लगाएको भिडियो सार्वजनिक भएपछि सो समयमा खटेका स्वास्थ्यकर्मी टिमलाई आइसोलेसन सेन्टरबाट हटाइएको हो ।

कोरोना विशेष अस्पतालका धनुषाका संयोजक डा. जामुन सिंहले आइसोलेसनमा बसेका कोरोना संक्रमितको ज्वरो नाप्न स्वीपरलाई पठाउने स्वास्थ्यकर्मी टोलीलाई प्रादेशिक अस्पतालमा फिर्ता बोलाएका छन् ।

आइतबार एक विज्ञप्ती जारी गर्दै डा. सिंहले सो विषयमा सत्यतथ्य छानविन गरी २४ घण्टाभित्र सार्वजनिक गर्ने पनि बताएका छन् । उक्त आइसोलेसनमा रिक्त रहेको स्वाथ्यकर्मीको ठाउँमा अर्को स्वास्थ्यकर्मीको टोली आजै पठाउन लागेको विज्ञप्तीमा उल्लेख गरिएको छ ।