प्रदेश २ सरकार बजेटको तयारीमा, कोभिड–१९ महामारी प्राथमिकता

जनकपुर-प्रदेश २ सरकारले आर्थिक वर्ष २०७८/०७९ को बजेटलाई कोभिड–१९ संक्रमण रोकथाममा केन्द्रित गर्ने भएको छ । बजेटको आन्तरिक तयारीमा जुटेको आर्थिक मामिला तथा योजना मन्त्रालयले संघीय बजेटलाई कुरेको देखिन्छ ।

संघीय सरकारको बजेटकै अधारमा प्रदेशको बजेट तयार हुने गरेको छ । संघीय बजेट आउने बितिकै प्रदेशको बजेट बनाउने काम द्रुतगतिमा अगाडि बढने आर्थिक मामिला तथा योजनामन्त्री विजयकुमार यादवले बताए ।

‘बजेटका आन्तरिक तयारीहरु भइरहेका छन्,’ उनले भने, संघीय बजेट आएपछि समय भित्रै प्रदेशको बजेट प्रस्तुत हुनेछ ।’

संघीय सरकारले बजेट थपेर दिए गत वर्षको तुलनामा बजेट केही बढ्ने उनले बताए । ‘बजेट मुख्यत: कोभिड–१९ संक्रमणलाई रोक्न र प्रदेशवासीको जीवन रक्षामा केन्द्रित हुनेछ’ उनले भने, ‘प्रदेश सरकारले अहिले कोरोना भाइरस विरुद्धको अभियानलाई नै प्राथमिकतामा राखेको छ ।’