जापानले नेपाललाई १६ लाख डोज एस्ट्राजेनेका खोप दिने, दोस्रो डोज पर्खिएका १४ लाख नागरिकलाई दिइने

काठमाडौं- जापानले नेपाललाई कोभ्याक्स सुविधामार्फत १६ लाख एस्ट्राजेनेका खोप दिने घोषणा गरेको छ। मंगलबार जापानका विदेशमन्त्रीले मोटेजी टोशिमिटसुले नेपाललाई कोभ्याक्स सुविधामार्फत १६ लाख एस्ट्राजेनेका खोप दिने घोषणा गरेको जापानी दुतावासले जनाएको हो।

नेपालका लागि जापानी राजदूत किकुटा याटकाले खोप अनुदान नेपाल र जापानबीचको लामो मैत्रीसम्बन्धको प्रतिवम्बित भएको जापानी दुतवासले जारी गरेको विज्ञप्तिमा उल्लेख छ। उक्त खोप कहिले पठाउने भन्ने बारे निर्णय भैनसकेको बताइएको छ।

कोभिशिल्डको दोस्रो खोप लगाउन नपाएका करिब झण्डै १४ लाख नागरिकलाई उक्त खोप दिइने विज्ञप्तिमा उल्लेख गरिएको छ। भारतले कोभिशिल्डको दोस्रो मात्रा उपलब्ध नगराएपछि स्वास्थ्य मन्त्रालयले यसअघि नै एस्ट्राजेनेका खोप लगाउने निर्णय  गरिसकेको छ।

मंगलबार प्रधानमन्त्री केपी शर्मा ओलीले पनि जापानबाट १६ लाख एस्ट्राजेनेका खोप आउने बारे जानकारी दिएका छन्।