मदिरा खाएका ४ जनाको ज्यान गयो

पोखरा – गलकोट नगरपालिका ७ मा मदिरा खाएका ६ जनामध्ये ४ जना युवाको मृत्यु भएको छ । अन्य २ जना गम्भीर बिरामी छन् । गम्भीर बिरामी परेकाहरुको पोखरामा उपचार भइरहेको छ ।

मृतकहरु नगरपालिकाको खानेपानी आयोजनामा कार्यरत मजदुरहरु रहेको खुलेको छ । उनीहरुसँग १४ जना साथीसँगै रहेको भए पनि ६ जनाले मात्रै मदिरा खाएका थिए ।

स्थानीय भद्रबहादुर बरालको पसलबाट ल्याइएको रक्सी खाएर रोपाका खेमराज घर्र्ती र रविन पुन गम्भीर बिरामी परेको जिल्ला प्रहरी कार्यालय बागलुङले जनाएको छ । उनीहरुको पोखरामा उपचार भइरहको छ । रोल्पाकै दीपेन्द्र पुन, दूधबहादुर राना, रेखबहादुर राना र प्रवीण घर्र्तीको मृत्यु भएको प्रहरीले जनाएको छ ।

अवैध मदिराको विक्री वितरण प्रतिबन्धित छ। तर, लुकिछिपी खुला मदिरा बिक्री भइरहेको छ । बेला-बेला प्रहरीले अवैध मदिरा बरामद गरी नष्ट गर्ने गरेको भए पनि यस्ता दुखद घटना भइरहन्छन् ।