धनगढीको कैलाली अस्पतालमा इन्डोस्कोपी प्रविधीबाट रक्तनली बाँधियो

धनगढी-सुदूरपश्चिममै पहिलो पटक धनगढीको कैलाली असपतालमा इन्डोस्कोपी प्रविधिबाट फुलेको रक्तनली बाँधिएको छ।

कैलाली अस्पतालमा काठमाडौँ वीर अस्पतालबाट आएका प्रमुख कन्सल्टेन्ट फिजिसिएन डाक्टर विधाननिधि पौडेलको समूहले पहिलो पटक फुलेको रक्तनली बाधेको हो।

कैलाली अस्पतालका अनुसार इन्डोस्कोपी प्रविधीबाट भजनी नगरपालिकाका ४५ वर्षीय रामप्रसाद चौधरीको फुलेको रक्तनली बाँधिएको हो । अत्याधिक मदिरा सेवनले लिभर खराब भए, हेपाटाईटीस वी, सी भए अन्तीम अवस्थामा मानिसको शरिरमा रगत प्रवाह बन्द भएर रक्तनली फुल्ने गरेको डा. पौडेलले बताए।

उनले रक्तनली फुलेपछि कलेजो ढुङ्गाजस्तो भएर रगतको प्रवाह नै रोकिएर फुटी मानिस रक्तश्राव भएर मानिसको मृत्यु नै हुने बताए। काठमाडौँपछि आफूले धनगढीमा पहिलो पटक इन्डोस्कोपी प्रविधीबाट फुलेको रक्तनली बाँधेको उनले बताए।