विकासप्रति जनताको चासो, स्वास्थ्य चौकी निर्माणको लागि तीन भाईले दिए ५ रोपनी जग्गा निशुल्क

म्याग्दी – रघुगङ्गा गाउँपालिका–१ बेगमा स्वास्थ्यचौकी निर्माणको लागि तीन जना दाजुभाईले पाँच रोपनी जग्गा निःशुल्क उपलब्ध गराएका छन् । स्थानीय लोकबहादुर फगामी, हिमबहादुर फगामी र गोपी फगामीले १० लाख मूल्य बराबरको जग्गा निशुल्क उपलब्ध गराएका हुन् । उनिहरुले मालपोत कार्यालय म्याग्दीबाट स्वास्थ्यचौकी व्यवस्थापन समितिको नाममा जग्गा पास गरिदिएका रघुगंगा गाउँपालिकाका अध्यक्ष भब बहादुर भण्डारीले जानकारी दिए । स्थानियले ५ रोपनी जग्गा उपलब्ध गराएसँगै स्वास्थ्यचौकी निर्माणको लागि आवश्यक पर्ने मापदण्ड अनुसारको जग्गा पुगेको उनले बताए । हाल वडा कार्यालयको भवनबाट स्वास्थ्यचौकी सञ्चालन भइरहेको छ ।
गाउँपालिकाले बेगमा बर्थिङ सेन्टरसहितको स्थास्थ्यचौकी निर्माणको तयारी गरेको छ । अस्पतालको निर्माण भने आगामी मंशिरदेखि थालिने अध्यक्ष भण्डारीको भनाई छ ।