लेखनाथ लायन्स अस्पताललाई प्रदेश सरकारको ७० लाख अनुदान

पोखरा–आफ्नै सरुवा रोग अस्पताल बनाउने योजनाअघि सारेको गण्डकी प्रदेशले पोखरा महानगरको लेखनाथमा रहेको लेखनाथ सामुदायिक लायन्स अस्पताललाई ७० लाख ३४ हजार अनुदान दिएको छ ।

यसअघि सो अस्पताललाई कोरोना डेडिकेटेड अस्पताल बनाउने प्रदेश सरकारले तयारी गरे पनि बीचमा रोकिएको थियो । अहिले सर्वसाधारणको सबैभन्दा बढी चाप हुने पश्चिमाञ्चल क्षेत्रीय अस्पतालमै कोरोना संक्रमितको उपचार भइरहेको छ ।

शुक्रबार बिहान बसेको गण्डकी प्रदेश सरकारको मन्त्रिपरिषद् बैठकले यो निर्णय गरेको हो । सरकारका प्रवक्ता रामशरण बस्नेतले कोभिड १९ को उपचारका लागि प्रदेश सरकारले यो अस्पताल सञ्चालन गर्ने तयारी गरेको जानकारी दिए । ‘अस्पतालमा भौतिक पूर्वाधार तयार गर्न, उपकरण किन्न र जनशक्ति थप गर्न अनुदान दिइएको हो,’ प्रवक्ता बस्नेतले भने ।