काठमाडौं—कोरोना संक्रमण पोजेटिभ देखिएपछि डा. ज्ञानेन्द्रमान सिंह कार्कीलाई विपी कोइराला स्वास्थ्य विज्ञान प्रतिष्ठान धरानमा उपचारका लागि लगिएको थियो । स्वास्थ्य समस्या बढ्दैं गएपछि अघिल्लो शनिबार हेलिकप्टरमार्फत त्रिवि शिक्षण अस्पताल काठमाडौं ल्याइएको थियो ।
शिक्षण अस्पतालमा उपचार क्रममा स्वास्थ्य झन जटिल बन्दैं गएपछि उनलाई आईसीयु विथ अक्सिजन सपोर्टमा राखेर उपचार सुरु गरिएको थियो । कोरोना संक्रमणले झन गम्भीर बनाउँदैं लगेपछि अक्सिजन लिन सक्ने क्षमता पनि कम हुँदैं गएको थियो । उपचारमा संलग्न चिकित्सककाअनुसार अक्सिजन लिने क्षमतामा ९० प्रतिशतले ह्रास आइसकेको थियो ।
शिक्षणका चिकित्सकहरुले गत शुक्रबार २६ वर्षीय कोरोना संक्रमणबाट निको भएका एक युवकको प्लाज्मा लिएर डा. कार्कीलाई दिएका थिए । ‘कन्भालेसेन्ट प्लाज्मा थेरापी’ गरिएपछि तीन दिनमा उनी आईसीयु विथ अक्सिजन सपोर्टबाट सामान्य वार्डमा फर्किएका छन् । वार्डमा फर्किएपछि हेल्थआवाजसँग उनले आफ्नो सन्देश सबैमाझ पु¥याइदिन आग्रह गरे । उनले दिएको सन्देशलाई हेल्थआवाजले जस्ताको तस्तै प्रस्तुत गरेको छ ।
त्रिवि शिक्षण अस्पताल मेरो कल्पनाबाहिरको रहेछ
हाम्रो देशमा स्वदेशका चिकित्सक, नर्स र स्वास्थ्यकर्मीहरुलाई अविश्वास गर्ने चलन छ । आजै म यो भन्न चाहन्छु, यो सोचाइलाई हामी तत्काल बदलौं । अझ सरकारी स्वास्थ्य संस्था त गन्दैनौं । तर, मैले यहाँ (त्रिवि शिक्षण अस्पताल) आएपछि थाहा पाए, यहाँ के मात्रै रहेनछ ।
पछिल्लो युवापुस्ता अति अब्बल छ । यो पुस्तालाई कसरी विदेश पलायन हुनबाट रोक्ने राज्यले अब गम्भीरतापूर्वक सोच्ने बेला भएको छ । उहाँहरुको डेडिकेसन पनि उतिकै सुन्दर छ । मैले यहाँ आएपछि धेरै नयाँ कुरा अनुभूत गर्ने अवसर पाए । अब मेरो बाँकी जीवन समाजसेवामै बित्नेछ । मेरा सबै उद्देश्य सामाजिक हुनेछन् ।
त्रिवि शिक्षण अस्पताल यस्तो व्यवस्थित होला भन्ने मैले कल्पना गरेको थिइन् । तर, आफै बिरामी भएपछि सबै देखे, भोगे । सरकारले यति सुविधासम्पन्न बनाएको देखेपछि म निकै भावुक भए । स्रोत साधन सरकारले सबै पु¥याइदिएको छ । यो मैले सोचेकै थिइन । मलाई डा. सुवास आचार्य, डा. पनेरुसहितका अन्य धेरै युवा चिकित्सक, नर्सलगायत सम्पूर्ण टिम (अहिले सबैलाई नाम लिएर सम्बोधन गर्न सकिन्) ले निकै केयर गर्नुभयो । उहाँहरुको ऋण कहिले र कसरी तिर्नु सक्छु मलाई थाहा छैन् ।
मैले यहाँ आएपछि थाहा पाए, हाम्रा युवा चिकित्सक एकदमै क्षमतावान र उर्जाशील रहेछन् । उनीहरुले नजानेको केही रहेनछ । चिकित्सक सबै जवान र ज्ञानी छन् । उनीहरु पलायन नहुन, रिटेन कसरी गर्ने भन्नेमा सोचौं । उनीहरुलाई थप राम्रो अवसर दिऔं र यही रोकौं । अब आजैका दिनदेखि हामीले त्यसका लागि योजना बनाउ । सरकारले कोरोनाको उपचारका खटिएका चिकित्सक, नर्स र स्वास्थ्यकर्मीहरुलाई कसरी प्रोत्साहन गर्ने त्यो योजना बनाएर तत्काल लागु गर्नुपर्छ ।
कोरोना विरुद्ध एक भएर लडौं
सबै तिरको कोरोनाको प्यानिक मात्रै थियो । हामी सबैमा पनि त्यसको प्रभाव रहेछ । म बिरामीको सेवामा वर्षौ खटिएको छु । म कहिल्यै राम्ररी सुतेको थिइन् ।
अब कोरोनालाई प्यानिक नबनाऔं । कोरोनाबाट मान्छे मरे भनेर संख्या मात्र नसुनाऔं । यस विरुद्ध अब यो सरकारी, यो निजी नभनेर मिलेर काम गरौं । नाका तत्काल पूर्ण रुपमा सिल गरौं । परीक्षण दायरा बढाऔं । जनतामा जनचेतना फैलाऔं । सत्ताका लागि यो बेला लडेर नबसौं ।
हामीसँग कोरोना विरुद्ध लड्ने युवा जनशक्ति मैदानमा खटिरहेको छ । उनीहरुको मनोबल सबै मिलेर बढाऔं । आवश्यक जनशक्ति तत्काल पूर्ति गरौं । १० हजार नर्स भर्ना गरौं, त्यही संख्यामा चिकित्सकको दरबन्दी खडा गरेर भर्ना गरौं । यो गर्न सकेमा हामी संसारमा कोरोना विरुद्धको लडाइमा नेपाललाई नमुना बनाउन सक्छौं । सबै कामलाई थाँती राखेर कोरोना विरुद्ध एक जुट भएर लडौं, जित हाम्रो हुनेछ ।
भगवानको कृपाले काठमाडौं आए
६० वर्षको उमेर । अलिकलि डाइबटिज, थोरै प्रेसर । कोरोनाकालभरि बिरामीकै उपचारमा खटिए । कहिल्यै पनि रेष्ट भनिन्, एक दिन पनि छुट्टी लिइन् । दैनिक हजार हाराहारीमा बिरामी हेरियो ।
थाहै नपाइकन कोरोना संक्रमण हुन पुगेछ । कोरोना पोजेटिभ देखिएपछि धरान गए । त्यहाँबाट भगवानको कृपाले काठमाडौं आए । सबैको प्रयासले अहिले निको हुने क्रममा छु ।
* यसअघि आईसीयु विद अक्सिजन सपोर्ट हुनुपर्नेमा अन्याथा भएकाले सच्चाइएको छ । सं.
यो पनि पढ्नुस
