पोखरा—पोखराको मणिपाल मेडिकल कलेजमा पहिलोपटक एओर्टिक प्रविधिबाट मुटुको भल्ब सफल प्रत्यारोपण गरिएको छ । शनिबार ८६ वर्षीय वृद्धको ट्रान्सक्याथेटर एओर्टिक भल्ब इम्प्लान्टेसन (टिएभीआई) भनिने भल्ब प्रत्यारोपण प्रविधीबाट मुटुको भल्ब प्रत्यारोपण गरिएको अस्पतालले जनाएको छ ।
वरिष्ठ मुटुरोग विशेषज्ञ डा. अमितकुमार चौरासिया, डा.नवराज पौडेललगायतको चिकित्सक टोलीले ८६ वर्षीय कालीदास तिमिल्सिनाको मुटुको भल्ब प्रत्यारोपण गरेको हो । टोलीले झण्डै डेढ घन्टा लगाएर भल्ब प्रत्यारोपण गरेको थियो ।
मणिपाल शिक्षण अस्पालका निर्देशक डा. अभिषेक मास्केले पोखरामा यसप्रकारको उपचार हुनु प्रदेशकै लागि खुसीको कुरा भएको बताए ।
बिरामीको मुटुको मुख्य भल्ब सुकेर साँघुरो हुँदा मुटुका नसामा रगतको कमी भई बहाबमा जटिलता हुन्छ । यस्तो अवस्थाभा टिएभिई गर्नु उपयुक्त हुन्छ ।
यस्तो समस्याका लागि पहिले ओपनहार्ट र बाइहार्ट सर्जरी हुने गरेको भएपनि टिएभिआई पद्धति सुरु भएको हो । बिरामीलाई भेन्टिलेटर नराखेरै उपचार गर्न सकिने यो पद्धतिबाट पोखरामै पहिलो पटक उपचार गरिएको दाबी अस्पतालको छ ।
