जुम्ला– नेपालकै पुरानोे प्राविधिक शिक्षालय कर्णाली प्राविधिक शिक्षालय जुम्लामा यो बर्षदेखि औषधि विज्ञान (डिप्लोमा इन फार्मेसी) पढाइ सुरु हुने भएको छ । चिकित्सा शिक्षा आयोगले अनुमति दिएसँगै डिप्लोमा इन फार्मेसी पढाइ सुरु हुने भएको हो ।
डिप्लोमा इन फार्मेसी अध्ययनका लागि कर्णालीका विद्यार्थी महंगो तिरेर पढ्न बाध्य थिए । कर्णाली प्राविधिक शिक्षालयका प्रमुख आशा कुमारी श्रेष्ठ डिप्लोमा इन फार्मेसी पढ्न तराइका जिल्लामा जानु पर्ने बाध्यता टरेको बताइन् । उनले भनिन्, ‘अब सस्तो, सुलभ र गुणस्तरीय रुपमा जुम्लामै औषधि विज्ञानको (डिप्लोमा इन फार्मेसी) पठनपाठन हुने छ । यो समग्र कर्णालीको लागि निकै सुखद पक्ष हो ।’
कर्णाली प्राविधिक शिक्षालय २०३७ सालमा स्थापना भएको थियो । टेस्टपास (१० कक्षा) एसएलसी देखि डिप्लोमा तह सम्मको शैक्षिक कार्यक्रम चलिरहेको छ । शिक्षालय प्रमुख श्रेष्ठले भनिन्, ‘तीन बर्षमा ९५ हजार ६ सय ६० रुपैयाँसम्म खर्च हुने देखिन्छ । यो कर्णालीका विद्यार्थीका लागि निकै सस्तो शिक्षा हुनेछ ।’
डिप्लोमा इन फार्मेसीका लागि ४० वटा कोटा निर्धारण गरिएको छ । जसमध्ये जुम्लाको लागि ४ जना, कर्णाली प्रदेशका ९ वटा जिल्लाबाट २÷२ जना हुनेछन् । ४ जनाले छात्रवृत्तिमा शिक्षा आर्जन गर्न पाउनेछन् । १४ सिट समानुपातिक ढंगबाट भर्ना गरिने छ ।
डिप्लोमा इन फार्मेसी विषयको पढाई हुने भएकाले इच्छुक विद्यार्थीले समयमै सम्पर्क गर्न शिक्षालयले आग्रह गरेको छ । प्राविधिक शिक्षालयले कृषि, निर्माण, अनमी र सिएमए तथा डिल्पोमा तह अन्तर्गत ओभरसियर, आईएस्सीएजी र फरेस्ट्री कार्यक्रम सञ्चालनमा छन् ।
लाखौँ रकम खर्चेर महंगा कलेजमा गएर प्राविधिक विषय अध्ययन गर्नबाट विद्यार्थीलाई राहत मिल्यो, शिक्षालय प्रमुख श्रेष्ठले भनिन््, ‘यो प्राविधिक शिक्षालय प्राविधिक जनशक्ति उत्पादन गर्ने उद्योग जस्तै बनेको छ । यहाँबाट उत्पादित जनशक्ति देशभर छरिएर सेवा गरिरहेका छन् ।’
कर्णाली प्राविधिक शिक्षालय शैक्षिक हब मात्र बनिरहेको छैन् । सदरमुकाम खलंगा पुग्ने जोसुकैले एकपटक प्राविधिक शिक्षालयको अवलोकन गर्ने गरेका छन् । यसले पर्यटन प्रवद्र्धनलाई समेत टेवा पर्याएको छ । कर्णाली प्राविधिक शिक्षालयमा सञ्चालन हुन थालेको डिप्लोमा इन फार्मेसीको पठनपाठन निकै अनुशासित र व्यवस्थित बनाउँदै लैजाने कर्णाली प्राविधिक शिक्षालय जुम्लाले जनाएको छ ।
