काठमाडौं–कोभिड–१९ नियन्त्रण र उपचारका लागि शक्तिशाली केन्द्रीय अस्पताल बनाइएको कोभिड–१९ केन्द्रीय अस्पताल (वीर अस्पताल)को कमाण्डरमा स्वास्थ्य तथा जनसंख्या मन्त्रालयका प्रवक्ता प्रा.डा. जागेश्वर गौतम नियुक्त भएका छन् । सोमबार मन्त्रीस्तरीय निर्णयबाट डा. गौतमलाई युनिफाइड केन्द्रीय अस्पतालको प्रमुख प्रशासकीय अधिकारीमा नियुक्त गरिएको मन्त्रालयका प्रशासन प्रमुख दामोदर रेग्मीले जानकारी दिए ।
नवनियुक्त प्रशासकीय अधिकारी डा. गौतमले मंगलबारदेखि नै कार्यभार सम्हाल्ने छन् ।
डा. गौतम र इन्सिडेन्ट कमाण्ड सिष्टमका प्रमुख डा. गुणराज लोहनी केन्द्रीय अस्पतालको प्रमुख प्रशासकीय अधिकारीका मुख्य दाबेदारका मानिएका थिए । हेल्थआवाजले सोमबार दिउँसो उक्त समाचार प्रकाशित गरेको थियो ।
नवनियुक्त डा. गौतम हक्की स्वभावका चिकित्सक मानिन्छन् । प्रधानमन्त्री केपी शर्मा ओलीले नै कोभिड–१९ निर्देशक समितिको अध्यक्ष भएकाले केन्द्रीय अस्पतालको नेतृत्वमा पनि उनकै रोजाइको व्यक्ति ल्याइएको हो ।
सचिव हुने लाइनमा नरहेका डा. गौतम सरकारी सेवामा रहँदा सम्झने गरी केही गर्न खोजिरहेका थिए । यतिबेला नै उनलाई देखाउने गरी काम गर्न पाउने युनिफाइड केन्द्रीय अस्पतालको नेतृत्व मिलेको छ । ‘मैले जिम्मेवारी पाए भने काम गरेर देखाउँछु,’ डा. गौतमले यसअघि हेल्थआवाजसँग भनेका थिए, ‘दिएको जिम्मेवारीबाट पछि हटने बानी छैन । म जिम्मेवारी दिएपछि काम गर्छु ।’
सरकारले हालै जारी गरेको कोभिड–१९ संकट व्यवस्थापन अध्यादेशमा वीर अस्पताललाई कोभिड–१९ युनिफाइड केन्द्रीय अस्पताल रुपमा सञ्चालन गर्ने कानुनी प्रबन्ध गरिएको छ । स्वास्थ्य तथा जनसंख्या मन्त्रालयको प्रत्यक्ष कमाण्डमा सञ्चालन हुने उक्त अस्पतालको नेतृत्व निजामती सेवाको राजपंत्राकित प्रथम श्रेणी वा स्वास्थ्य सेवाको ११ औं तहको वरिष्ठ अधिकारी वा वरिष्ठ चिकित्सकले गर्ने व्यवस्था छ ।
डा. गौतम स्वास्थ्य मन्त्रालयको ११ औं तहका बरिष्ठ अधिकारीका साथै वरिष्ठ चिकित्सक पनि हुन् । गौतम काम गरेर देखाउने स्वभावका अधिकारीहरुमा पर्छन् । डा. गौतम मन्त्रालयको प्रवक्ता हुनुअघि परोपकार प्रसुति गृह थापाथालीका निर्देशक थिए, उनले त्यहाँ थिती बसाएको स्वास्थ्यका अधिकारीहरु बताउँछन् ।
सबै कोभिड–१९ अस्पतालहरुको नियमनदेखि बिरामीको उपचार व्यवस्थापनसम्म जिम्मेवारी केन्द्रीय अस्पतालको छ । यस्तै, अस्पतालले प्रयोगशालादेखि खरिदसम्मका महत्वपूर्ण काम गर्ने अधिकार पनि केन्द्रीय अस्पतालले पाएको छ । जसका कारण युनिफाइड केन्द्रीय अस्पतालको प्रमुख प्रशासकीय अधिकारीको नियुक्तिलाई महत्वका साथ हेरिएको थियो ।
यो पनि पढ्नुस
