कोरोना भाइरसबाट क्यानडाका प्रधानमन्त्रीकी पत्नी सोफी संक्रमित

टोरेन्टो—क्यानडाका प्रधानमन्त्री जस्टिन ट्रूडोकी पत्नीलाई कोरोना भाइरसको संक्रमण देखिएको छ । जस्टिनकी पत्नी सोफी ट्रूडोलाई कोरोना भाइरस देखिएको क्यानडाको स्वास्थ्य मन्त्रालयले पुष्टी गरेको छ ।

सोफीसँगै अब जस्टिन पनि आइसोलेसनमा रहेछन् । उनी घरबाटै सरकारी कामकाज सम्हाल्ने समाचार एजेन्सीहरुले जनाएका छन् ।

सोफी मंगलबारमात्रै लण्डनबाट फर्किएकी थिइन् । लगतै उनी बिरामी परेकी थिइन् । आइतबार उनको टेष्ट रिपोर्टमा कोरोना पोजेटिभ आएको थियो । क्यानडा सरकारले भनेको छ, ‘सोफीको अवस्था अहिले पहिलेको भन्दा राम्रो छ ।’

कोरोनाका कारण क्यानडामा १ जनाको मृत्यु भएको छ भने १ सय २८ जनामा संक्रमण देखिएको छ । विश्व स्वास्थ्य संगठनले कोरोना महामारी घोषणा गरेको छ । अहिलेसम्म संसारभर कोरोनाबाट संक्रमित हुनेहरुको संख्या १ लाख ३४ हजार बढी पुगेको छ भने यसबाट ४ हजार ९ सय ७३ जनाको मृत्यु भएको छ ।