धनगढी– कञ्चनपुरको लालझाडी गाँउपालिकामा १५ शय्याको गाँउपालिका स्तरीय अस्पताल बन्ने भएको छ । चारैतिर दोदा नदी, सडक सञ्जालले जोडिनबाट बञ्चित भएको लालझाडीका नागरिकको स्वास्थ्य सुरक्षाका लागि गाँउपालिकाले १५ शय्याको अस्पताल बनाउने भएको हो ।
संघीय सरकारबाट १० शय्या र स्थानीय सरकारबाट ५ शय्या थप गरेर लालझाडी अस्पताल बन्नेछ । लालझाडी गाँउपालिका प्रमुख मदन सेन बडायकले अस्पतल निर्माणका लागि प्रकृया अघि बढिसकेको बताए । ‘अस्पतालल निर्माणका लागि हामीले प्रकृया अघि बढाईसकेका छौँ,’ उनले भने, ‘हाल टेण्डर प्रकृयामा छौँ ।’
गाउँपालिका प्रमुख बडायकले संघीय सरकारबाट १० शय्या र स्थानीय सरकारबाट थप ५ शय्या गरी १५ शय्याको अस्पताल निर्माण गरिने बताए । ‘हाल १० शय्याको योजना भएपनि त्यसले निकट भविष्यमा अपुग हुन्छ,’ उनले भने, ‘५ शय्याका लागि गाँउपालिकाले स्रोत जुटाउँछ ।’
१० करोड ८३ लाख बजेट आएको प्रमुख बडायकले बताए ।
लालझाडी गाँउपालिका ३ नन्दगाँउको शंकर आधारभूत विद्यालयले १५ कठ्ठा जमिन उपलब्ध गराईसकेको प्रमुख बडायकले बताए । ‘अस्पतालका लागि जमिन प्राप्त भइसकेको छ,’ उनले भने,‘डीपीआर काम अघि बढिसकेको छ ।’ अस्पतालको विस्तृत अध्ययन प्रतिवेदन डीपीआर का लागि चालु आर्थिक बर्ष २०७७÷०७८ मा ८५ लाख बजेट आइसकेको छ ।
