जनकपुर – महोत्तरीमा कोभिड- १९ संक्रमण पुष्टि भएका सञ्चारकर्मीको संख्या आठ पुगेको छ । मंगलबार एकैदिन थप चार जना सञ्चारकर्मीमा कोभिड–१९ संक्रमण पुष्टि भएपछि संख्या बढेर आठ पुगेको हो । यसअघि नै चार जनामा संक्रमण पुष्टि भएको थियो ।
आज संक्रमण पुष्टि भएका चारैजना बर्दिवासस्थित रेडियो सुनगाभामा कार्यरत सञ्चारकर्मी हुन् । निकेश खनाल, सरस्वती भुजेल, मनोज थापामगर र आशा तोलङ्गेले आफूमा कोभिड–१९ संक्रमण पुष्टि भएको बताए । चार दिनअघिदेखि सामान्य टाउँको दुख्ने र ज्वरो आउने लक्षण भएपछि स्वाब परीक्षण गराउँदा चारैजनामा संक्रमण पुष्टि भएको रेडियो सुनगाभाका प्रबन्धक निकेश खनालले जानकारी दिए ।
सम्बन्धित चारैजना आफैँले यसको पुष्टि गरेका छन् । यसअघि राससकर्मी गोपालप्रसाद बराल र कान्तिपुरकर्मी सुनिता बराल पीसीआर परीक्षणबाट कोभिड–१९ संक्रमण पुष्टि भएपछि अहिले ‘होमआइसोलेसन’मा छन् । गोपालको गत बिहीबार र सुनिताको गत शनिबार संक्रमण पुष्टि भएको हो ।
यसैगरी, अन्नपूर्णकर्मी राजकरण महतो र न्यूज–२४ का ललनकुमार मण्डलमा कोभिड–१९ पुष्टि भएको थियो । यद्यपि, महतो र मण्डल दुवै संक्रमणमुक्त भइसकेका छन् ।
महतोमा असोज–१० गते र मण्डलमा गत भदौमै स्वाब परीक्षणबाट संक्रमण पुष्टि भएको थियो । जिल्लाका यी सबै सञ्चारकर्मीले बर्दिवास अस्पतालमा स्वाब परीक्षणका लागि दिएको हो । यता, पत्रकार महासंघ महाेत्तरीले संक्रमित भएका पत्रकारहरू चिन्ता व्यत्त गरेका छन ।
