धनुषा–महोत्तरीको वर्दिवासस्थित वर्दिवास सेवा समितिले वर्दिवास अस्पताललाई एउटा एम्बुलेन्स उपलब्ध गराएको छ । कोभिड–१९ महामारीमा मृत्यु भएकाहरुको शव व्यवस्थानमा समस्या परेपछि नगरपालिकाले वर्दिवास सेवा समितिसँग रहेको एम्बुलेन्सलाई शव वहानको रुपमा प्रयोग गर्न माग गरेको थियो ।
वर्दिवास उद्योग वाणिज्य संघ र वर्दिवास सेवा समितिका युवाहरुले १० लाख चन्दा संकलन गरेर १४ वर्ष अघि ज १ च ६२२ नम्बरको एम्बुलेन्स खरिद गरेका थिए । वर्दिवास नगरपालिकास्थित वर्दिवास अस्पतालको नाममा नामसारी गर्ने गरी आफ्नो संस्थाको एम्बुलेन्सको साँचो नगरपालिकाका मेयर विदुरकुमार कार्कीलाई हस्तान्तरण गरेको वर्दिवास सेवा समितिका अध्यक्ष हिरा गौतमले बताए ।
‘कोभिड–१९ ले महामारीले विकराल रुप लिदैं गएको छ । यसको नियन्त्रणमा हाम्रो पनि योग्दान होस् भनेर हामीले चलाइरहेको एम्बुलेन्स शव बाहनका रुपमा प्रयोग गर्न वर्दिवास नगरपालिकाकालाई हस्तान्तरण गरेका हौं,’ उनले भने ।
कोभिड–१९ महामारी विरुद्धको लडाइमा सबै तिरबाट सरकारलाई सहयोग भइरहेको मेयर कार्कीले बताए । ‘अस्ति लगातार तीन घण्टा फोन गर्दा पनि शव व्यवस्थापन गर्न सवारी नभेटिएको हामीसँग तितो अनुभव छ,’ मेयर कार्कीले भने, ‘वदिवास सेवा समितिले यस्तो विपद्को अवस्थामा जुन एम्बुलेन्स हामीलाई प्रदान गर्नुभयो । त्यसको खुशी हामी शब्दमा व्यक्त गर्न सक्दैनौं ।’
