दोरम्बाका स्थानीयलाई एभरेष्ट अस्पतालमा ३७ प्रतिशतसम्म छुट

काठमाडौं—काठमाडौंको नयाँ बानेश्वरस्थित एभरेष्ट अस्पतालमा उपचार गर्दा रामेछापको दोरम्बाका स्थानीयलाई भारी छुट दिने सम्झौता भएको छ । बुधबार हस्पिटल व्यवस्थापन र नेकपा (माओवादी) दोरम्बा शैलुङ काठमाडौं सम्पर्क समिति बीचमा दोरम्बाका स्थानीयलाई ३७ प्रतिशतसम्म छुट दिने सम्झौता भएको हो ।

सम्झौतापत्रमा सम्पर्क समितिका अध्यक्ष होमबहादुर नगरकोटी, सचिव सुशील चौलागाईं र अस्पतालको प्रशासकीय प्रमुख दीपकचन्द्र बरालले हस्ताक्षर गरेका छन् । सम्झौताअनुसार दोरम्बा शैलुङ गाउँपालिकामा स्थायी बसोबास गर्नेहरूलाई ३७ प्रतिशत छुटमा उपचार सुविधा दिइने अस्पतालका प्रशासकीय प्रमुख बरालले बताए ।

सम्पर्क समितिका सचिव सुशील चौलागाईंले अब दोरम्बावासीले एभरेष्ट अस्पतालमा ३७ प्रतिशत छुट पाउने जानकारी दिए । ‘इनहाउस, ओटी, फार्मेसी र रिफर लगायतका शीषर्कमा ३७ प्रतिशतसम्म छुटको व्यवस्था गर्नेगरी सम्झौता भएको छ,’ उनले भने । छुट सुविधा पाउन बिरामीहरूलाई सो गाउँपालिका स्थायी ठेगाना खुल्ने नागरिकता र सम्पर्क समितिको सिफारिस आवश्यक पर्छ ।