मकालु बेस क्याम्पमा ४३ वर्षीय डा. अरुणको लेक लागेर मृत्यु

चरिकोट—मकालु बेस क्याम्प घुम्न पुगेका दोलखा मेलुङ गाउँपालिका–७ का डा. अरुण कार्कीको मृत्यु भएको छ । ४३ वर्षीय डा. कार्कीको लेक लागेर मृत्यु भएको हो ।

१ मंसिरमा मकालु बेस क्याम्प पुगेका कार्कीको उच्च हिमाली क्षेत्रमा अचानक स्वास्थ्यमा समस्या देखा परेपछि ज्यान गएको जिल्ला प्रहरी कार्यालय संखुवासभाले जनाएको छ । मकालु बेस क्याम्प नजिकै असहज महसुस भएपछि तत्काल सहयोग नपाउँदा उनको मृत्यु भएको प्रहरी कार्यालय संखुवासभाले पुष्टि गरेको हो ।

प्रहरीकाअनुसार घटनाबारे जानकारी पाउनसाथ जिल्ला प्रहरी कार्यालय संखुवासभाबाट प्रहरी निरीक्षक मेघराज अर्यालको नेतृत्वमा घटनास्थलतर्फ खटिएको थियो । उक्त टोलीले ३ मंसिरमा एभरेष्टको हेलिकप्टरमार्फत शव संखुवासभाबाट काठमाडौं पठाएको हो ।

स्थानीयका अनुसार डा. कार्की जनस्वास्थ्य कार्यालय दोलखाका पूर्वप्रमुख कुमार विक्रम कार्की र मैया कार्कीका छोरा हुन् । डा. अरुण कार्की छाला रोग विशेषज्ञ समेत रहेका जनाइएको छ । घटनाका सम्बन्धमा आवश्यक अनुसन्धान अघि बढाइने प्रहरीले जनाएको छ ।