लुम्बिनी प्रादेशिक अस्पतालको मेसुमा डा. ढकाल

बुटवल-लुम्बिनी प्रदेश सरकारको गौरवको योजनाका रूपमा रहेको लुम्बिनी प्रादेशिक अस्पताल बुटवलमा नयाँ मेडिकल सुपरिटेन्डेन्ट नियुक्त भएका छन् । प्रदेश सरकारले अस्पतालमा हाडजोर्नी विशेषज्ञका रुपमा रहेका १० औं तहका डा. इन्द्र ढकाललाई नियुक्त गर्ने निर्णय गरेको हो ।

हाल कार्यरत मेसु डा.राजेन्द्र खनाललाई पदमुक्त गरी डा.ढकाललाई ल्याउने निर्णय भएको प्रदेश सरकारका आर्थिक मामिला मन्त्री तथा सरकारका प्रवक्ता कृष्णध्वज खड्काले बताए । ‘हालका मेसु डा.खनाललाई अर्को जिम्मेवारी दिने निर्णय भएको छ । डा. ढकाललाई अर्को व्यवस्था नभएसम्मका लागि निमित्त भै कामकाज गर्न अनुमति दिइएको हो,’ उनले भने ।

डा. खनाललाई कोभिड अस्पताल संचालन तथा व्यवस्थापन समितिको संयोजक जिम्मेवारी दिइएको मन्त्री खड्काले बताए । यसअघि पनि प्रदेश सरकारले डा. खनाललाई रेडियोलोजी विभागमा सरुवा गरेर डा. ढकाललाई मेसु नियुक्त गर्ने निर्णय भएपनि प्रक्रिया नमिलेको भन्दै कार्यन्वयन भएको थिएन ।