जुम्ला–नेपाल पत्रकार महासंघ शाखा जुम्लाले कोरोना संक्रमित पत्रकारका लागि आइसोलेसन कक्ष निर्माण गरेको छ । पत्रकार महासंघको भवनमा पाँच बेडको आइसोलेसन कक्ष बनेको हो ।
अहिलेसम्म जुम्लामा पत्रकार संक्रमित नभएपनि आगामी दिनमा संक्रमित हुन सक्ने अवस्थालाई मध्यनजर गर्दै आइसोलेसन कक्ष तयार पारिएको अध्यक्ष नेत्रबहादुर शाहीले बताए ।
सदरमुकाम खलंगास्थित महासंघले आफ्नै भवनमा पाँच बेडको आइसोलेसन कक्ष तयार गरेको हो । अध्यक्ष शाहीले भने, ‘हालसम्म जुम्लामा कार्यरत स्थानीय तथा राष्ट्रियस्तरमा काम गर्ने कुनै पत्रकालाई संक्रमण देखिएको छैन । तर, पत्रकार संक्रमणको उच्च जोखिममा रहेका छन् ।’
तत्कालका लागि पाँच बेडको आइसोलेसन कक्ष तयार पारिएको बताउँदै उनले आवश्यकताअनुसार आइसोलेसन बेड थप्ने जानकारी दिए ।
जुम्लामा कार्यरत अधिकांश पत्रकार कोठा भाडामा बस्छन् । संक्रमित भइहालेमा पनि भाडाकै कोठामा बस्न सम्भव छैन् । अस्पतालले अक्सिजन दिनुपर्ने संक्रमितबाहेक अरुलाई भर्ना लिने गरेको छैन ।
महासंघको भवनमा आइसोलेसन बनाउनका लागि पेस नेपाल जुम्ला नामक गैरसरकारी संस्थाले आर्थिक सहयोग गरेको हो । पेस नेपाल जुम्लाले पाँच वटा फाइबर सिरक, १० वटा डस्ना, ५ वटा सिरानी, ३० मिटर पीपी फर्म, ५ वटा तन्ना, ५ वटा बाटा, ५ वटा जग, ५ वटा गिलास, ५ वटा बाल्टीन र ५ वटा रुमाल गरी करिब ५० हजार बराबरको ९ प्रकारका सामाग्री उपलब्ध गराएको हो ।
कोरोना महमारीबाट सुरक्षित रहन आइसोलेसन निर्माणका लागि थोरै भएपनि साथ दिने प्रयास गरेको पेस नेपालका कार्यकारी अध्यक्ष किशोर न्यौपाने बताए ।